काठमाण्डौं: नक्कली कागपत्र बनाई बैंकबाट ४ करोड ६० लाख ठगी गरेको अभियोगमा ६ जनालाई प्रहरीले पक्राउ गरेको छ ।
प्रहरीले उनिहरुलाई राजमार्गसँग जोडिएको जग्गा देखाएर खोलाको बगर धितो राखी ठगी गरेको अभियोगमा पक्राउ गरेको हो ।
पक्राउ पर्नेमा सुनसरी इटहरी एभरेष्ट कन्सल्टेन्सीका इञ्जिनियर भेषराज खत्री, मोरङ बेलबारी का इञ्जिनीयर कर्ण चामलिङ, मकवानपुर हेटौँडा स्थाईघर भई काठमाडौंको नयाँ बानेश्वर बस्ने सुरेन्द्र श्रेष्ठ, काठमाडौं महराजगञ्जका भूपेन्द्र श्रेष्ठ, चितवन भण्डारा स्थाईघर भई काठमाडौं नयाँ बानेश्वरमा बस्ने ऋषिश्वर थपलिया, उदयपुर गाईघाटका कृष्ण कार्की रहेका छन् ।
नक्कली कागपत्र बनाई स्वर्णिम एण्ड श्रीजन कम्पनीको लागि बैंकबाट ४ करोड ६० लाख ऋण निकालिएको जिल्ला प्रहरी कार्यालय झापाका प्रवक्ता महेन्द्रकुमार श्रेष्ठले बताएका छन् ।
राजमार्गसँगै जोडिएको झापा कनकाई–९ स्थित कित्ता नं ३५९६ को ०–२–१० बिघा र कित्ता नं ३२७१ को ०–२–० बिघाको जग्गाको नक्कली नक्सा बनाएर खोलाको बगर धितो राखी ऋण लिएको हुँदा उनिहरूलाई ‘बैंकिङ कसुर र सरकारी छाप कीर्ते गरी नक्कली कागजात तयार गरेको अरोपमा पक्राउ गरेको प्रवक्ता श्रेष्ठले बताए ।
पक्राउ पर्ने ६ जनामाथि थप अनुसन्धान भइरहेको प्रहरीले जनाएको छ ।
