काठमाण्डौंः प्रधानमन्त्री एवं नेकपा अध्यक्ष केपी शर्मा ओली पार्टीका कार्यकारी अध्यक्ष पुष्पकमल दाहाल ‘प्रचण्ड’ भेट्न उनको निजी निवास खुमलटार पुगेका छन् ।
केहि समयदेखि नेकपाभित्रको विवाद उत्कर्षमा पुगेका बेला थामथुम पार्ने उदेश्यले प्रधानमन्त्री ओली दाहाल भेट्न खुमलटार पुगेको स्रोतको दाबी छ । ब्रेकफाष्ट मिटिङको नाम दिए पनि पार्टीभित्रको आन्तरिक किचलोको मुख्य विषयमा छलफल हुने जनाइएको छ ।
संवैधानिक परिषद्सम्बन्धी विवादास्पद अध्यादेश फिर्ता गर्ने गत बुधबारको अध्यक्षद्वयबीच भएको सहमति पालनामा प्रधानमन्त्रीले आलटाल गरेको भन्दै दाहाल रिसाएपछी उनलाई फकाउन प्रधानमन्त्री ओली पूर्ण सुरक्षाका साथ त्याहाँ पुगेका हुन् ।
प्रधानमन्त्री ओली खुमलटार पुग्नु अगावै पार्टी महासचिव विष्णु पौडेल भने बिहानै प्रचण्ड निवास पुगिसकेका थिए ।
गत कात्तिक २८ गते कार्यकारी अध्यक्ष प्रचण्डले राजनीतिक प्रस्ताव ल्याएपछि त्यसको जवाफमा ओलीले पनि मंसिर १३ गते आफ्नो प्रतिवेदन सचिवालयमा पेश गरेयता नेकपा विवाद उत्कर्षमा पुगेको छ । ओलीको खुमलटार भेटलाई अर्थपूर्ण रुपमा हेरिएको छ ।