काठमाण्डौः नेपाली कांग्रेसले महामन्त्री पूर्णबहादुर खड्कालाई आगामी मंसिर १४ गते हुने उप निर्वाचनको चुनावी कमाण्डरको जिम्मेवारी तोकेको छ ।
देउवा निवाश बुढानिलकण्ठमा बसेको पदाधिकारी बैठकले उपनिर्वाचनको चुनावी अभियानलाई सशक्त बनाउन केन्द्रमा महामन्त्री पूर्ण बहादुर खड्कालाई केन्द्रिय संयोजन गर्ने जिम्मेवारी दिएको हो ।
महामन्त्री खड्काको संयोजनमा अव उपनिर्वाचन हुने सम्बन्धित जिल्लाहरूमा चुनावी रणनीति बन्नेछन् । महामन्त्री खड्काले पार्टीले जिल्ला जिल्लामा निर्वाचनलाई लक्षित गरेर प्रचार समिति तथा उपसमितिहरू बनाएको र उम्मेदवारसहित घरदैलो कार्यक्रम समेत शुरु भइसकेको र अव केन्द्रबाट चुनावका लागि केन्द्रिय प्रतिनिधि तोकेर पठाइने बताए ।
उपनिर्वाचन हुने ३७ जिल्लामा काँग्रेसले जिल्लासँगको समन्वयमा आवश्यकता अनुसार शीर्ष नेताहरूलाई समेत जिल्ला उतार्ने रणनीतिका साथ काम गरिरहेको बताएको छ ।
पार्टीले सबै भ्रातृ तथा शुभेच्छुक संस्थाहरूलाई उपनिर्वाचन हुने जिल्लामा प्रचार प्रसार तथा निर्वाचन लक्षित सबै कार्यक्रममा सहभागी हुन निर्देशन दिइसकेको छ ।
हाल काँग्रेस केन्द्रले जिल्लामा जाने नेताहरूलाई नयाँ नियम पनि बनाएको छ । उम्मेदवार र स्थानीय काँग्रेसले जुन नेतालाई बोलाउँछ त्यो नेता केन्द्रको अुनमति लिएर मात्र उप निर्वाचन हुने जिल्लामा जान पाउने नियम कांग्रेसले बनाएको हो ।
