काठमाण्डौः पूर्ण धार्मिक स्वतन्त्रता सहितको हिन्दु राष्ट्रको माग गर्दै राष्ट्रिय प्रजातन्त्र पार्टी (संयुक्त) ले जनकपुर- लुम्बिनी धार्मिक रथ यात्राको शुरू गरेको छ ।
नेपाललाई हिन्दुराष्ट्र बनाउने उद्देश्य सहित राप्रपा (संयुक्त) ले अध्यक्षद्धय डा. प्रकाशचन्द्र लोहनी र पशुपति शम्शेर जबराले संयुक्त रूपमा जनकपुरबाट रथ यात्राको शुभारम्भ गरेका छन् ।
बिहीबारबाट शुरू गरिएको धार्मिक यात्रामा सो पार्टीका नेता कार्यकर्ता लगायत अभिनेत्री रेखा थापा समेत सहभागी भएकी थिईन् ।
सबै धर्मबीच समानता, पूर्ण धार्मिक स्वतन्त्रता सहितको हिन्दु राष्ट्र नेपाल घोषणा हुनुपर्ने बताउँदै आएको राप्रपा संयुक्तले मंसिर ४ गते समापन हुने प्रवक्ता जनकराज पाठकले हरियाली नेपाललाइ जानकारी दिए ।
पहिलो चरणको एक हप्ते अभियान अन्तर्गत जनकपुरदेखि लुम्बिनीसम्म यात्रा आरम्भ गरिएको प्रवक्ता पाठकले बताए । जानकी मन्दिर परिसरबाट निस्केको रथयात्राको पहिलो दिन महोत्तरी जलेश्वर राम गोपालपुरमा पुगी कोण सभामा परिणत भएको छ ।
त्यस्तै दोस्रो दिन कार्तिक २९ गते मलंगवा- सर्लाही- नवलपुर, गौर रौतहटमा कोणसभा हुने बताईएको छ ।
कार्तिक ३० गते गढीमाई दर्शन, कलैया बारामा कोण सभा, मसिंर-१ गते हेटौडा र भरतपुरमा कोणसभा र साँझ नारायणी नदीमा आरती गरिने राप्रपा संयुक्तले जानकारी दिएको छ ।
यसैगरी मसिंर २ गते कावासोतीमा कोण सभा र वाल्मिकी आश्रमको दर्शन, मंसिर-३ गते रामग्राम नवलपरासीमा र भैरहवामा कोणसभाको आयोजना गरिने कार्यक्रम तय गरिएको छ ।
यस्तै मंसीर -४ गते शान्तिका अग्रदुत भगवान गौतम बुद्धको पवित्र जन्मभुमि लुम्विनीमा पुजा अर्चना सहित पहिलो चरणको धार्मिक यात्राको समापन कार्यक्रम रहेको छ ।
राप्रपा (संयुक्त)का अध्यक्ष डा. प्रकाशचन्द्र लोहनीले विश्वको एकमात्र सनातन हिन्दु राष्ट्रको पहिचान भएको नेपाललाई पुनः हिन्दुराष्ट्र निर्माणका लागि सर्वसाधारणलाई जागरुक बनाउन यात्राको सुरुवात गरिएको बताएका छन् ।
