काठमाण्डौः प्रतिबन्धित नेत्रविक्रम चन्द ‘विप्लव’ नेतृत्वको नेकपाका तीन जना कार्यकर्तालाई प्रहरीले पक्राउ गरेको छ ।
जिल्ला प्रहरी कार्यालय दाङबाट खटिएको बिशेष टोलीले विप्लव समूहका दाङ बबई गाउँपालिकाका एरिया इन्चार्ज र अर्का सहयोगीलाइ लुकीछिपी हिँडिरहेको अवस्थामा प्रहरीले शनिबार सवा एक बजे बबई–५ ट्वाङखोलाबाट पक्राउ गरेको हो ।
पक्राउ पर्नेहरूमा बबई गाउँपालिकाका एरिया इन्चार्ज निमबहादुर डाँगी र बबई-५ निवासी ३२ वर्षीय डाँगी रहेका छन् ।
प्रहरीले उनीहरूले प्रयोग गरेको प्रदेश ३–०२००७प १२०४ नं लेखिएको जिक्सर मोटरसाइकल समेत बरामद गरेको जनाएको छ ।
जिल्ला प्रहरी कार्यालय दाङका प्रहरी नायब उपरीक्षक विनोदविक्रम शाहका अनुसार ट्वाङखोलाबाट पक्राउ गरिएका दुबै जनालाई ईलाका प्रहरी कार्यालय तुलसीपुरमा राखेर अनुसन्धान शुरू गरिएको छ ।
अघिल्लो दिन दाङको शान्तिनगरबाट पनि विप्लव समूहका सेक्सन कमाण्डर पक्राउ परेका थिए ।
विप्लव समूहका शान्तिनगर गाउँपालिका–१ पटेरीखोला निवासी ३० वर्षीय प्रकाश बुढामगरलाई शुक्रबार पक्राउ गरेको जिल्ला प्रहरी कार्यालय दाङले जानकारी दिएको छ ।
उनलाई पनि इलाका प्रहरी कार्यालय तुलसीपुर राखेर अनुसन्धान शुरू गरिएको प्रहरीले जनाएको छ ।
