काठमाण्डौः सरकारले आठौं कर दिवसको अवसरमा १५ विधाका उत्कृष्ट करदातालाई सम्मान गरेको छ ।
अर्थमन्त्री डा. युवराज खतिवडाले आईतबार बिहान आयोजित कार्यक्रम मार्फत गत वर्ष सबैभन्दा धेरै कर तिरेर राज्यलाई योगदान गर्ने उत्कृष्ट करदाताहरुलाई सम्मान गरेका हुन् ।
आन्तरिक राजश्व विभागले सर्वाधिक कर तिर्नेमा बहुराष्ट्रिय कम्पनी सूर्य नेपाल प्राइभेट लिमिटेडलाई सम्मान गरेको छ । सुर्य नेपाल ठुलो चुरोट उत्पादन गर्ने उद्योग हो । सूर्य लगातार बढी कर तिर्ने कम्पनीको सूचीमा पर्दै आएको छ । यस्तै व्यक्तिगततर्फ सबैभन्दा बढी कर तिर्नेमा तारा म्यानेजमेन्ट प्रालिका प्रवन्ध निर्देशक सिद्धार्थसम्शेर राणा रहेका छन । राणा लगातार चौथोपटक धेरै कर तिर्ने करदाता बनेका छन् ।
अर्थ मन्त्रालयका अनुसार, निर्यातकर्ताहरूमध्ये सबैभन्दा बढी आयकर डाबर नेपालले तिरेको छ । मदिरा र चुरोट बाहेक सबैभन्दा बढी आयकर तिर्नेमा भने जगदम्बा स्टिल अग्रपंक्तिमा रहेको छ । बैंकहरु मध्येबाट राष्ट्रिय वाणिज्य बैंकले बढी कर तिरेको छ भने लघुवित्तबाट छिमेकी लघुवित्तले बढी कर तिरेकोले सम्मानित भएको छ ।
यसैगरी सञ्चार क्षेत्रबाट वर्डलिङ्क कम्युनिकेसन, बिमाबाट नेपाल लाईफ इन्स्योरेन्स कम्पनी लिमिटेड, स्वास्थ्य तथा शिक्षामा मणिपाल मेडिकल कलेज, व्यापार व्यवसायमा अग्नि इन्टरप्राईजेज प्रालि र पर्यटनबाट तारागाउँ रिजेन्सी होटल, रहेका छन ।
यस्तै कृषितर्फ अन्नपूर्ण एग्रो र मध्यमस्तरिय करदाताका तर्फबाट कामना विकास बैंक, घोराही सिमेन्ट उद्योगलाई पनि सम्मान गरिएको छ ।
