काठमाण्डौ: प्रधानमन्त्री केपी शर्मा ओलीले कालापानीमा रहेका भारतीय सेना हटाई छाड्ने उद्घोष गरेका छन् ।
आइतबार नेकपाको युवा संगठन राष्ट्रिय युवा संघको प्रशिक्षण कार्यक्रमलाई सम्बोधन गर्ने क्रममा प्रधानमन्त्री ओलिले भारतीय सेनालाई नेपाली भूमिबाट हटाउने मात्र नभई अतिक्रमित नेपाली भू-भाग फिर्ता ल्याउनुपर्ने बताएका हुन् ।
अघिल्लो शताब्दीदेखि नै नेपालको सीमा मिच्ने काम भएको उल्लेख गर्दै प्रधानमन्त्री ओलीले सीमा मिचिएको कुरालाई अहिले नै हो भनेर कतिपयले आफूलाई हिरो देखाउन उचाल्ने काम गरेको बताए । उनले वर्तमान सरकार सीमा समस्या समाधान गर्न सक्षम रहेको पनि स्पष्ट पारे ।
सोही अबसरमा प्रधानमन्त्री ओलीले सिमावर्ती क्षेत्र कालापानी, लिपुलेक, लिम्पियाधुरामा रहेका भारतीय सेना फिर्ता गर्न भारतलाई आग्रह गरे ।
नेपालीहरु शान्तिको पक्षमा रहेको र छिमेकीसँग कुनै पनि तनाब नहोस् भन्ने पक्षमा रहेको प्रधानमन्त्रीले दोहोर्याए ।
उनले सरकारले संवाद मार्फत सीमा सम्बन्धी समस्या समाधान गर्ने भन्दै कतिपयले नक्सा सच्याउने कुरा उठाएपनि भूमि फिर्ता लिने विषय महत्वपुर्ण भएको बताए । सरकार आफ्नो भूमि फिर्ता गर्न सक्षम रहेको उल्लेख गर्दै प्रधानमन्त्री ओलीले सरकार राष्ट्रिय हितको पक्षमा अड्न र लड्न सक्ने पनि बताए ।
सीमा समस्या सरकारले संवादको माध्यमबाट समाधान गर्नुपर्ने भन्दै प्रधानमन्त्रीले नक्सा त प्रेसमा छापे भइहाल्यो हामी भूमि फिर्ता लिन्छौं भनेका छन् ।
नेपालको जमिनबाट भारतीय सेना फिर्ता पठाइ नेपाली सेना राख्छौं प्रधानमन्त्रीले भनेका छन् । शान्ति सेनामा सेना पठाएर अरुको रक्षा गर्न सक्ने हामी आफ्नो पनि रक्षा गर्न सक्छौ बताएका छन् ।
अहिले दैनिक जसो भारतले जारी गरेको राजनीतिक नक्सामा नेपाली भूमि लिम्पियाधुरा, कालापानी र लिपुलेकलाई समावेश गरेपछि नेपालमा भारतको सर्वत्र विरोध भइरहेको छ ।
