काठमाण्डौ: नेकपाको सचिवालय बैठकले पाँच वर्षसम्म केपी शर्मा ओली नै प्रधानमन्त्री बन्ने निर्णय गरेको छ ।
प्रधानमन्त्री निवास बालुवाटारमा बसेको सचिवालय बैठकले कार्यकारी अधिकार सहितको अध्यक्षमा पुष्पकमल दाहाल प्रचण्डलाई दिने निर्णय गरेको हो ।
यसअघि दुई अध्यक्षले आजै बिहान राष्ट्रपति विद्यादेवि भण्डारी सामु पुगेर निर्णयका बिषयमा जानकारी गराएका थिए ।
आजको बैठकमा अध्यक्षद्वय प्रधानमन्त्री केपी शर्मा ओली, अध्यक्ष पुष्पकमल दाहाल ‘प्रचण्ड’, नेता माधवकुमार नेपाल, सचिवालय सदस्य वामदेव गौतम, रामबहादुर थापा, महासचिव विष्णुप्रसाद पौडेल तथा प्रवक्ता नारायणकाजी श्रेष्ठ सहभागी भएका थिए ।
त्यस्तै आजको बैठकमा वरिष्ठ नेता झलनाथ खनाल र सचिवालय सदस्य ईश्वर पोखरेल मुलुक बाहिर भएकोले उक्त बैठकमा सहभागी भएका छैनन् ।
नेपाल कम्युनिस्ट पार्टीको सचिवालय बैठकले ५ जना मन्त्री हेरफेर गर्ने निर्णय गरेको छ।
प्रधानमन्त्री निवास बालुवाटारमा बसेको पार्टीको सचिवालय बैठकले ५ मन्त्रीको हेरफेर गर्ने निर्णय गरेको बैठकमा सहभागी एक सचिवालय सदस्यले जानकारी दिएका छन्।
