काठमाण्डौः सरकारले मोटरसाइकल मार्फत सेवा दिँदै आएको ‘टुटल’ र ‘पठाओ’ लाई यात्रु ओसारपसारमा रोक लगाएको छ ।
भौतिक पूर्वाधार तथा यातायात मन्त्रालय अन्तर्गतको यातायात व्यवस्था विभागले सार्वजनिक सूचना जारी गर्दै ‘टुटल’ र ‘पठाओ’ले एउटा प्रयोजनका लागि दर्ता गरेर अर्कै प्रयोजनमा प्रयोग प्रयोग गरेकोले कार्वाही स्वरूप यात्रु ओसारपसारमा रोक लगाएको जनाएको हो ।
विभागले मंगलबार जारी गरेको सूचनामा निजी प्रयोजनका लागि दर्ता भएका सवारीसाधनलाई सार्वजनिक यातायातका रुपमा प्रयोग गरेको पाइएमा कारबाही गर्ने उल्लेख छ । यद्दपी पठाओ र टुटलको नाम भने विभागले जारी गरेको सूचनामा लिएको छैन । उक्त सूचनामा भनिएको छ विभागले कानुन विरुद्ध जान कसैलाई पनि छुट नभएको जनाउँदै कानुनको उल्लङघन गरे कारबाही गर्ने जनाएको छ ।
सवारी तथा यातायात व्यवस्था ऐन २०४९ को दफा ८ (२) मा निजी सवारी यातायात सेवाका लागि प्रयोग गर्न पाइने उल्लेख छ भने दफा १२ मा कुनै एक प्रयोजनको निम्ति दर्ता भएको सवारी अर्को प्रयोजनको निम्ति प्रयोग गर्न नपाइने कानुनी व्यवस्था छ ।
विभागले यसै नियमका आधारमा कारबाही गर्ने जनाएको हो । एक प्रयोजनको निम्ति दर्ता भएर अर्को प्रयोजन गरेको पाइए पाँचसय देखि दुई हजार रूपैयाँसम्म जरिवाना हुने कानुनी व्यवस्था छ ।
यातायात सेवा सञ्चालन गर्न यातायात व्यवस्था विभागमा दर्ता हुनुपर्ने प्रावधान छ । टुटल र पठाओ यातायात व्यवस्था विभागमा दर्ता छैनन् भने कम्पनी रजिस्ट्रार कार्यालयमा दर्ता भएर सञ्चालन हुँदै आएका छन् । टुटल र पठाओमा करिब ५० हजार राइडर आवद्ध रहेका छन् ।
यसअघि पनि भौतिक पूर्वाधार तथा यातायात मन्त्रालयले टुटल र पठाओमाथि रोक लगाएको थियो । त्यसको चौतर्फी विरोधपछि प्रधानमन्त्री केपी शर्मा ओलीले तत्कालका लागि सेवा जारी राख्न निर्देशन दिएका थिए । उनले कानुनी मापदण्डमा ल्याएर सञ्चालन गर्न भन्दै तत्काल नरोकन निर्देशन दिएपछि टुटल र पठाओ सञ्चालन हुँदै आएका थिए ।
रातो प्लेटका सवारीसाधनले यात्रु ओसार्नु अवैधानिक हुने भएकाले कानुनी वैधता नपाएसम्म सञ्चालन गर्न नदिइने विभाग जनाउँछ । विभागले मंगलबार सार्वजनिक सूचना जारी गरेर कारबाही गर्ने जनाए पनि बुधबार साँझसम्म पठाओ र टुटलले सेवा बन्द नगरेको पाइएको छ ।
