काठमाण्डौ: गएराती अज्ञात समुहले सिन्धुलीको दुधौलीमा स्काभेटर र जेसीबीमा प्रेसरकुकर बम आक्रमण गरेका छ्न् ।
सिन्धुलीको दुधौली नगरपालिका-१४ ककुरठाकुर भन्ने ईलाकामा आधा दर्जन बढी स्काभेटर र जेसीबीमा प्रेसरकुकर बम आक्रमण गरिएको स्थानियले बताएका छ्न् ।
ककुरठाकुरस्थित चुनढुङ्गा उत्खननमा मारुती सिमेन्ट उद्योगका लागि प्रयोग गरिरहेका ती ६ वटा स्काभेटर र जेसीबिमा अज्ञात समुहले बम आक्रमण गरेको प्रहरीले जनाएको छ।
सो आक्रमणमा १ स्काभेटर र १ जेसीबीमा पूर्णरुपमा क्षति पुगेको छ । अन्य स्काभेटर र एउटा जेसीबीको सिसा फुटेको जिल्ला प्रहरी कार्यालय सिन्धुलीका प्रमुख (एसपी) चक्रबहादुर सिंहले जनाकारी दिएका छ्न् ।
सिन्धुली र उदयपुर जिल्लाको सिमाना नजिकै रहेको झाँक्रीटारमा राती एकै ठाउँमा पार्किङ गरेर राखिएका ती साधनमा अज्ञात समुहले तीनवटा प्रेसर कुकर राखेका थिए।
प्रहरीका अनुसार एउटा बमले विस्फोट भएर क्षति पुर्याएको छ भने अन्य दुई प्रेसरकुकर बम स्काभेटर र जेसीबीमा नै रहेको बताईएको छ ।
त्यस स्थानमा बम निस्कृय पार्न नेपाली सेनाको टोलि त्यसतर्फ पठाउने तयारी भएको समेत प्रहरी प्रमुख सिंहले बताएका छ्न् ।
सिन्धुलीको दुधौली नगरपालिका १३ मा निर्माण व्यवसायी छेत्र बम्जनको स्काभेटरमा आगजनी भएको एक दिन नबित्दै सोही क्षेत्रमा निर्माण समाग्रीमाथि आक्रमण भएको हो ।
निर्माण व्यवसायी छेत्र बम्जनसँग प्रतिबन्धित नेकपा विप्लव कार्यकर्ताले एक करोड ५० लाख रुपैयाँ चन्दा माग गरिरहेका बेला स्काभेटर जलाएको घटनामा विप्लव कार्यकर्ताहरुकै संलग्नता भएको आशंका गरिएको छ।
