काठमाण्डौ: झापाको सुरुङ्गास्थित कनकाई बहुमुखी क्याम्पसमा विद्यार्थीहरुले गरेको तालाबन्दी प्रहरीले फुटाएको छ ।
लिम्बुवान निकट विद्यार्थीहरुले शुक्रबार विहान क्याम्पसको प्रशासनिक भवनको मूल गेटमा ताला लगाएको क्याम्पस प्रशासनले जनाएको छ ।
ईलाका प्रहरी कार्यालय बिर्तामोडका अनुसार ताला लगाएको २ घण्टासम्म पनि प्रहरीले ताला नखोलेपछि सो ताला फोडेको जनाएको छ ।
नेकपा निकट अनेरास्ववियु र लिम्बुवान विद्यार्थी मञ्चका विद्यार्थीले उक्त क्याम्पसमा दोस्रोपटक तालाबन्दी गरेका हुन् । यसअघि गत १९ कात्तिकमा पनि लगाइएको ताला २३ कात्तिकमा प्रहरीले तोडेको थियो ।
सो क्याम्पसमा विद्यार्थीहरुले क्याम्पसमा नियमित पठनपाठन नभएको, प्राध्यापक हरि तिम्सिनालाई पुनर्बहाली गर्नुपर्ने, भाडामा ल्याइएका प्राध्यापकहरुलाई फिर्ता पठाउनुपर्ने र ९ जना विद्यार्थी विरुद्ध प्रहरी कार्यालयमा परेको उजुरी फिर्ता लिनुपर्ने लगायतका माग राखेका छन् ।
क्याम्पस प्राध्यापक हरि तिम्सिनाको करार नविकरण नगरिएको भन्दै नेकपा निकट विद्यार्थीले आन्दोलन गर्दै आएको सो कन्काई बहुमुखी क्याम्पसमा करिब तीन सातादेखि पठनपाठन प्रभावित हुँदै आएको छ ।
