काठमाण्डौ: आइतबारको घटनालाई लिएर भोली सोमबार बाँकेको कोहलपुर क्षेत्रमा रहेका सम्पूर्ण संस्थागत विद्यालयहरु बन्द गरिने भएको छ ।
सोमबार सम्पूर्ण शैक्षिक संस्था बन्द गर्ने निर्णय गरिएको क्रिशा बाँकेका अध्यक्ष शिव प्रसाद डाँगीले जानकारी दिएका हुन् ।
त्यस्तै प्याब्सन कोहलपुरका अध्यक्ष यम रावत र नेपाल प्याब्सनका कोहलपुर अध्यक्ष बेग प्रकाश चन्दको संयुक्त हस्ताक्षरित एक विज्ञप्ती निकाल्दै सोमबार कोहलपुरमा रहेका सम्पूर्ण शैक्षिक संस्थाहरू बन्द गर्ने उल्लेख गरीएको छ ।
आईतबार बिहान स्थानिय त्रिभुवन उच्च माविमा अध्ययनरत छात्रा प्रगती चन्द ट्रकको ठक्करबाट घाइते भएपछि भएको प्रदर्शनमा प्रहरीको गोली लागेर कोहलपुरमा दुई विद्यार्थी घाइते भएका थिए ।
घटना लगत्तै आक्रोशित भएका विदार्थीहरुले कोहलपुरमा आन्दोलन गरेका थिए । आन्दोलनका क्रममा विद्यालय बोकेका सवारी साधनमा समेत तोडफोड गरीएको भन्दै विज्ञप्ती मार्फत गम्भीर ध्यानाकर्षण भएको उल्लेख गरिएको छ ।

