काठमाण्डौः फणिन्द्र नेपाल नेतृत्वको ग्रेटर नेपाल राष्ट्रवादी मोर्चाले नेपालको टिष्टादेखि काँकडासम्मको भू-भाग भारतबाट तत्काल फिर्ता गराउन माग गर्दै ज्ञापन पत्र बुझाएको छ ।
मोर्चाका अध्यक्ष फणिन्द्र नेपालले हाल नेपाल भ्रमणमा रहेका बेलायती सेनाका प्रमुख जनरल सर मार्क कार्लटन स्मिथलाई सम्बोधन गरिएको पत्र शुक्रबार अपरान्ह लैनचौर स्थित बेलायती राजदूताबासमा बुझाएको हो ।
अध्यक्ष नेपालले सुगौली सन्धी अनुसार बेलायती कम्पनी इष्ट इण्डियाले नेपालसँग सम्झौता गरी लिएको ६० हजार बर्ग किमी जमिन (पूर्वको टिष्टा नदिदेखि पश्चिमको काँकडासम्मको भूभाग) फिर्ता गर्न माग गरिएको छ ।
तत्कालिन बेलायती कम्पनीले नेपालसँग सम्झौता गरी कब्जा गरेको सो जमिन फिता गर्ने दायित्व समेत संयुक्त अधिराज्य बेलायतकै भएको स्मरण गराउँदै पत्रमा सन् १८१६ को मार्च ४ तारिखका दिनमा भएको सम्झौता बमोजिमको जमिन नेपाललाई इमान्दारीपूर्वक फिर्ता गर्ने दायित्व सम्झन भनिएको छ ।
उक्त पत्रमा ग्रेटर नेपाल राष्ट्रवादी मोर्चाले भारतसँग पटक पटक नेपालको ६० हजार बर्ग किमी भूमि फिर्ता गर्न आग्रह गर्दा समेत कुनै वास्ता नगरिएको भन्दै भारतलाई नेपाली भूमिमाथि शासन गर्ने वैधानिक आधार नभएको सम्झाइएको छ ।


