काठमाण्डौः आठौं संविधान दिवस आज विभिन्न कार्यक्रम गरी मनाइएको छ ।
सरकारले सैनिक मञ्च टुँडिखेलमा आज विशेष समारोह आयोजना गर्यो । समारोहलाई सम्बोधन गर्दै कार्यवाहक प्रधानमन्त्री एवं रक्षामन्त्री पूर्णबहादुर खड्काले संविधान कार्यान्वयनलाई गति दिँदै राजनीतिक स्थायित्व, शान्ति र सुशासन कायम गर्ने दिशामा सरकार प्रयासरत रहेको बताए । संविधानका आधारस्तम्भ सबल बन्दै गएसँगै देशमा राजनीतिक स्थायित्व कायम भएकाले अबको कार्यसूची सुशासन, समृद्धि र सामाजिक न्याय भएको उनले स्पष्ट पारे ।
समारोहमा राष्ट्रपति रामचन्द्र पौडेलसहित मन्त्रीहरु, संवैधानिक निकायका प्रमुख एवं पदाधिकारी, नेपालस्थित विदेशी कूटनीतिज्ञलगायत सहभागी थिए । समारोहमा नेपाली सेनाले हेलिकोप्टरबाट पुष्पवृष्टि गर्नुका साथै टुँडिखेलमा परेड तथा मार्चपास गरेको थियो ।
यस्तै संविधान दिवसका अवसरमा शीतलनिवासमा आयोजित समारोहमा राष्ट्रपति रामचन्द्र पौडेलले राज्यको चरित्र पुरानै अवस्थामा रहेको भन्दै पुन:संरचना गर्नुपर्ने बताएका छन् । उनले जनताको भविष्य सुखद बनाउन राजनीतिक दलहरुले नै संविधानको रक्षा र राजनीतिक उपलब्धिलाई जोगाउनुपर्ने बताए ।
