काठमाण्डौः नेपाल मजदुर किसान पार्टी (नेमकिपा)ले सातवटै प्रदेशमा संयोजक तोकेको छ । नेपाल मजदुर किसान पार्टी (नेमकिपा) केन्द्रीय समितिको मंगलबार सातौ महाधिवेशनपछि बसेको पहिलो केन्द्रिय समितिको बैठकले प्रदेश संयोजक तोकेको हो ।
नवनिर्वाचित पार्टी अध्यक्ष नारायणमान विजुक्छें (रोहित)को निजी निवास कमलविनायक भक्तपुरमा आयोजित पत्रकार सम्मेलनमा प्रदेश संयोजक तोकिएको जानकारी दिइएको हो ।
अध्यक्ष रोहितका अनुसार प्रदेश नं १ को संयोजकमा उमेश कवां, प्रदेश नं २ मा सुरेन्द्रराज गोसाँई, प्रदेश नं ३ मा प्रेम सुवाल संयोजक तोकिएका छन् । यसैगरी प्रदेश नं ४ मा डिल्लीप्रसाद काफ्ले, प्रदेश नं ५ मा हरिसुन्दर बासी, प्रदेश नं ६ मा सरोजराज गोसाँई र प्रदेश नं ७ मा नन्दबहादुर शाहीलाई प्रदेश संयोजक तोकिएका छन् ।
वैठकले पार्टी अध्यक्ष विजुक्छेंको अध्यक्षतामा पाँच सदस्यीय केन्द्रिय सचिवालय पनि गठन गरेको पत्रकार सम्मेलनमा जानकारी दिइएको थियो । अध्यक्ष विजुक्छेंको अध्यक्षतामा गठित सचिवालय सदस्यहरूमा प्रेम सुवाल, मोहनप्रसाद प्रजापति, सुनिल प्रजापति र नन्दबहादुर शाही रहेका छन् ।
सोही अवशरमा अध्यक्ष विजुक्छेंले सचिवालय सदस्यहरू मध्यबाट पार्टी सचिवमा प्रेम सुवाल र कोषाध्यक्षमा मोहनप्रसाद प्रजापतिलाइ जिम्मेवारी तोकिएको जानकारी दिएका छन् ।
यसैगरी पहिलो केन्द्रिय समितिको बैठकले केन्द्रीय सदस्यमा रवीन्द्र ज्याख्व र वैकल्पिक केन्द्रीय सदस्यमा राजेन्द्र चवाल र नारायणबहादुर दुवाललाइ मनोनित गरेको जनाएको छ । असोज पहिलो साता भक्तपुरमा सम्पन्न सातौ महाधिवेशनले विजुक्छेंको अध्यक्षतामा २५ सदस्यीय केन्द्रीय समिति निर्वाचित गरेको थियो।
