काठमाण्डौः सत्तारूढ नेपाल कम्युनिस्ट पार्टी (नेकपा)का वरिष्ठ नेता एवं विदेश विभाग प्रमुख माधवकुमार नेपालले पूर्वराजा ज्ञानेन्द्र शाहले ०६३ वैशाख ११ मा जारी गरेको विज्ञप्तिको सम्पूर्ण ड्राफ्ट तत्कालीन एमालेले गरेर दिएको बताएका छन् ।
भरतमोहन अधिकारी स्मृति फाउन्डेसनले शनिबार काठमाण्डौँको वानेश्वर ब्याङ्क्वेटमा आयोजना गरेको ‘भरतमोहन अधिकारीः व्यक्ति एक, व्यक्तित्व अनेक’ विषयक गोष्ठिमा बोल्दै नेता नेपालले उक्त कुरा बताएका हुन् । उक्त वक्तव्यको ड्राफ्ट समेत भरतमोहन अधिकारीले गरेको उनको भनाइ छ ।
नेता नेपालले सुरुमा प्यारा देशबासीहरु र अन्तिममा श्री पशुपतिनाथले हामी सबैको कल्याण गरुन् भन्ने शब्द बाहेक राजाले सबै एमालेले लेखेर दिएको विज्ञप्ती पढेको दावी समेत गरेका हुन् ।
हामीले हाम्रो ड्राफ्ट अनुसार राजाको सम्बोधन हुनुपर्छ भन्ने अडान लिएपछि ९ बजेका लागि तय भएको ज्ञानेन्द्रको घोषणा राति ११ बजे भएको समेत बताएका थिए ।
कार्यक्रममा पूर्वमन्त्री राधाकृष्ण मैनाली, स्वर्गीय अधिकारीका बालसखासमेत रहेका नेता एवं पत्रकार कमल कोइराला, प्राध्यापक कृष्ण पोखरेल, डा. गोविन्दबहादुर थापा र अधिकारी पत्नी सविता अधिकारी लगायतले स्वर्गिय भरतमोहन अधिकारीको व्यक्तित्व र कृतित्वको चर्चा गरेका थिए ।
