काठमाण्डौं: प्रतिबन्धित नेकपा विप्लव समुहले झापाको अर्जुनधारा न.पा.- १ शान्तिचोक स्थित लेखनाथ मिश्रको घरमा लुकाइराखेको बारूदी गोदम प्रहरीले फेला पारेको छ ।
नेकपा विप्लवका झापा जिल्ला सेक्रेटरी प्रबिण मिश्र “मनिष”ले लेखनाथ मिश्रको घर उत्तरतर्फ रहेको गाई गोठमा पँहेलो बोराभित्र लुकाई छिपाई लगेर गाडेको अवस्थामा बारूदी गोदाम फेला परेको हो ।
उक्त विष्फोटक पदार्थ चियाको बोटमा हाल्ने औषधी हो भनी विप्लव समूहको झापा जिल्ला सेक्रेटरी मनिष भन्ने प्रविन मिश्र, जिल्ला इन्चार्ज सुमन सिंह पौडेल, जिल्ला जनसरकार प्रमुख (जिल्ला सदस्य) टिका पोखरेलले करिब २० दिन अगाडि लेखनाथ मिश्रको घरमा भण्डारण गरेर राखेको प्रहरीको प्रारम्भिक अनुसन्धानबाट खुलेको छ ।
प्रबिण मिश्रलाई प्रहरीले पक्राउ गरेको सुइको पाएपछी लेखनाथ मिश्रका आफन्तले झापाका प्रमुख जिल्ला अधिकारी उदय बहादुर रानामगरलाई फोन मार्फत घटनाको जानकारी दिएको बताइएको छ ।
लगत्तै जिल्ला प्रहरी कार्यालय, झापा र इलाका प्रहरी कार्यालय, अनारमनीको संयुक्त टोलीले उक्त स्थानमा आईतबार साँझ पुगी सुरक्षित घेरेर झापाको चारआली स्थित नेपाली सेनाको ब्यारेकमा खबर गरेका थिए । सेनाको बम डिस्पोजल टोलीले जमिनमुनी गाडेको अवस्थामा राखेको बिष्फोटक पदार्थ सुरक्षित रुपमा निकालिएको थियो ।
बिस्फोटक बस्तु नियोजेल लेखिएको २०५ लोला (२५.६२५ किलोग्राम) ‘हाइ एक्सप्लोसिभ’ रहेको र उक्त बिष्फोटक पदार्थलाई ईलाका प्रहरी कार्यालय बिर्तामोडमा सुरक्षित राखी अनुसन्धान भइरहेको प्रहरीले जनाएको छ ।
