काठमाण्डौः पुजारी श्रीराम साह हत्याको छानबिन र दोषीलाई कारबाहीको माग गर्ने समूहलाई नै पक्रेर कारबाही गर्ने गरी गृह मन्त्रालयले प्रहरी र स्थानीय प्रशासनलाई पत्राचार गरेको घटनाप्रति विश्व हिन्दु महासंघले विरोध जनाएको छ।
महासंघले बिहीबार विज्ञप्ति जारी गरी घटनाका दोषीलाई तत्काल सार्वजनिक गरी कारबाही गर्न र पीडितलाई क्षतिपूर्ति उपलब्ध गराउन सरकारसँग माग गरेको छ। मन्त्रालयको भदौ ७ गतेको पत्रमा घटनाको विरोध गर्ने समूहलाई नै कारबाही गर्न सबै प्रमुख जिल्ला अधिकारी र प्रहरी महानिरीक्षकलाई स्पष्ट निर्देशनसहित पत्राचार गरेको महासंघले दाबी गरेको छ।
मन्त्रालयको यो निर्णयले सम्पूर्ण धर्मावलम्बीको भावनामाथि नै कुठाराघात भएको महासंघ महासचिव अस्मिता भण्डारीले जारी गरेको विज्ञप्तिमा उल्लेख छ। धार्मिक सहिष्णुता र सामाजिक सद्भाव बिथोल्ने गरी भएको यस्तो निर्णयप्रति महासंघले गृह मन्त्रालयसँग जवाफसमेत मागेको छ।
