काठमाण्डाैंः जिल्ला प्रशासन कार्यालय बाँकेले नेपालमा रहेका भारतीयहरुलाई भारततर्फ पठाउने तयारी शुरु गरेको छ । भारतको नानपारा क्वारेन्टाईनमा रहेका नेपालीहरुलाई स्वदेश ल्याउने क्रममा त्यहाँ रहेका भारतीयहरुलाई फिर्ता पठाउन लागिएको जनाएको हो ।

लम्बिदो लकडाउनका कारण भारतको बहराईच, नानपारा आसपासका क्षेत्रका क्वारेन्टाईनमा राखिएका तथा सिमा नाकामा अलपत्र अवस्थामा रहेका नेपालीहरुलाई स्वदेश फिर्ता गराउन लागिएको जिल्ला प्रहरी कार्यालय बाँकेका प्रमुख एसपी विर बहादुर वलीले जानकारी दिए ।
नेपालका बिभिन्न क्वारेन्टाइन, होटल तथा आफन्त कहाँ बसेका अन्दाजी पाँच सय भारतीयलाई सीमा पार गराइने र सोही सङ्ख्यामै नेपालीहरु नेपाल प्रवेश गर्ने आँकलन गरीएको वलीले बताए ।
नेपाल प्रवेश गर्ने सबैलाई जमुनाहमै आडिटी बिधिबाट कोरोना परिक्षण गर्ने तयारी गरीएको बताउँदै वलीले जिल्ला भित्रका नागरिकहरुलाई महेन्द्र क्याम्पसमा रहेको क्वारेन्टाइनमा राखिने र अन्यलाई उनिहरुकै गृह जिल्लामा पठाउने तयारी भइरहेको जानकारी दिए ।
नेपाल भित्रिने ब्यक्तिहरुको स्वास्थ्य परिक्षणकालागि जमुनाहमा नेपाली सेनाले क्याम्प स्थापना गरेको जिल्ला स्वास्थ्य कार्यालय बाँकेका फोकल पर्शन नरेश श्रेष्ठले जानकारी दिए । श्रेष्ठका अनुसार भारतबाट आउने नेपालीहरुलाई पहिलो चरणमा (र्यापिड डाइनोस्टिक टेष्ट) आरडिटी बिधिबाट परिक्षण गरीने छ । आरडिटीको रिपोर्ट नेगेटिभ देखिएमा उनिहरुलाई सम्बन्धित जिल्ला पठाउने बारे छलफल भइरहेको श्रेष्ठले बताए । नागरिक खबर


