गण्डकी, १५ फागुन : गाउँ नगर मिडिया सेन्टर नेपालले विकासप्रेमी नेता स्वर्गीय रवीन्द्र अधिकारीको सातौँ स्मृतिका अवसरमा रवीन्द्र स्मृति पत्रकारिता पुरस्कारको घोषणा गरेको छ । उहाँको सातौँ स्मृति दिवसका सन्दर्भ पारेर संस्थाले पुरस्कारको घोषणा गरेको हो ।
ग्रामीण क्षेत्रको विकास निर्माण, कृषि, पर्यटन प्रवर्द्धनको क्षेत्रमा उजागर गर्ने मुख्य लक्ष्यका डेढ दशकअघि उहाँकै पहलमा सेन्टर स्थापना भएको संस्थाका अध्यक्ष हरिप्रसाद बाँस्तोलाले जानकारी दिनुभयो ।
उहाँका अनुसार प्रत्येक वर्ष फागुन १५ गते एक समारोहको बीच एक जना क्रियाशील पत्रकारलाई सम्मान गरिने सो पुरस्कारको राशि रु ११ हजार १११, सम्मानपत्र र दोसल्लाले सम्मान गरिने छ । रवीन्द्र अधिकारीको पहलमा सङ्कलन भएको रु एक लाख १५ हजारमा बीउपुँजीका रूपमा रहेको रकमलाई वृद्धि गरी रु २५ लाख पुर्याउने संस्थाको लक्ष्य छ ।
पुरस्कारको राशि वृद्धिका लागि पहल गर्ने रवीन्द्र स्मृति प्रतिष्ठानका महासचिव एवं पोखरा महानगरपालिका प्रमुख धनराज आचार्यले आज सहिद स्मारपार्क पोखरा–१८ जामुनावाटमा आयोजित सातौँ स्मृतिसभामा जानकारी दिनुभयो । प्रतिष्ठानको सक्रियतामा सो स्थानमा उहाँको पूर्णकदको सालिक पनि निर्माण गरिएको छ ।
सरल जीवनशैली र विकासप्रति समर्पित तत्कालीन संस्कृति, पर्यटन तथा नागरिक उड्डयनमन्त्री अधिकारीको २०७५ साल फागुन १५ गते तप्लेजुङमा हेलिकप्टर दुर्घटनामा परी निधन भएको थियो । आवश्यकताअनुसार विभिन्न जिल्लामा संस्थाको शाखा विस्तार गरिने मिडिया सेन्टरका सचिव कृष्णबहादुर थापाले बताउनुभयो ।
