भक्तपुर । सूर्यविनायक नगरपालिका–८ जगाती जाँचचौकीबाट १० किलो गाँजासहित एक जनालाई प्रहरीले पक्राउ गरेको छ।
जिल्ला प्रहरी परिसर भक्तपुरका प्रहरी नायब उपरीक्षक दीपककुमार कार्कीका अनुसार बागमती प्रदेश ०८–००१ ज ०१४२ नम्बरको टाटा सुमोबाट उक्त परिमाणको गाँजा बरामद गरिएको हो। सोही सवारीसाधनमा सवार खोटाङको हलेसी तुवाचुङ नगरपालिका–५ का देवेन्द्र राईलाई गाँजासहित नियन्त्रणमा लिइएको प्रहरीले जनाएको छ।
पक्राउ परेका राईलाई भक्तपुर जिल्ला अदालतबाट १५ दिनको म्याद थप गरी अनुसन्धान अगाडि बढाइएको प्रहरी नायब उपरीक्षक कार्कीले जानकारी दिएका छन्। घटनाबारे थप अनुसन्धान भइरहेको छ।
