काठमाडौं । काठमाडौंको बालाजुमा लागूऔषध नियन्त्रण ब्युरोको टोलीले एक राउन्ड हवाई फायर गर्दै लागूऔषध कारोबारमा संलग्न रहेको आरोपमा एक युवकलाई पक्राउ गरेको छ।
प्रहरीका अनुसार पक्राउ परेका युवकको साथबाट ३०० ग्राम खैरो हेरोइन बरामद गरिएको छ। लागूऔषध कारोबार भइरहेको सूचनाका आधारमा खटिएको प्रहरी टोलीले उनलाई नियन्त्रणमा लिएको हो।
प्रहरी निरीक्षक राकेश यादवको नेतृत्वमा खटिएको लागूऔषध नियन्त्रण ब्युरोको टोलीले युवकलाई पक्राउ गर्ने क्रममा एक राउन्ड हवाई फायर गरेको बताइएको छ।
पक्राउ परेका युवक र बरामद लागूऔषधबारे थप अनुसन्धान भइरहेको प्रहरीले जनाएको छ। घटनासम्बन्धी अन्य विस्तृत विवरण भने सार्वजनिक हुन बाँकी छ।
