काठमाण्डौं: मन्त्रिपरिषद बैठकले पारीत गरेको ‘राष्ट्रिय शिक्षा नीति-२०७६’ बिहिबार जारी गरिएको छ ।
शिक्षा मन्त्रालयमा आयोजित एक विशेष कार्यक्रमका बीच ‘राष्ट्रिय शिक्षा नीति–२०७६’ जारी भएको हो ।
एक वर्षको लामो गृहकार्यपछि पुरा भएको शिक्षा नीतिलाई गएको कात्तिक १८ गते बसेको मन्त्रिपरिषदको बैठकले पारित गरेको थियो ।
उपप्रधान एवं रक्षामन्त्री ईश्वर पोखरेलको नेतृत्वमा ६ सदस्यीय समिति गठन गरी शिक्षा मन्त्रालयले राष्ट्रिय शिक्षा नीतिको मस्यौदालाई अन्तिम रुप दिएको हो ।
राष्ट्रिय शिक्षा नीति जारी भएसँगै अबका दिनमा पालिका तहमा शिक्षा ऐन बनाउन सहज हुने भएको छ ।
राष्ट्रिय शिक्षा नीतिमा कम्पनी ऐनअन्तर्गत सञ्चालित निजी लगानीका विद्यालयहरुलाई संक्रमणकालीन व्यवस्थापनका रूपमा गैरनाफामुखी सेवामूलक सामाजिक संस्थाका रूपमा रूपान्तरण गर्ने र आउँदो एक दशकभित्र कम्पनी, सहकारी, गुठी लगायतबाट सञ्चालित सम्पूर्ण विद्यालयहरूलाई एउटै ढाँचामा ल्याउने बारे विभिन्न कुरा समेटिएको छ ।
मन्त्रालय सम्हालेपछि शिक्षा क्षेत्रको विभिन्न ३६ बुँदामा सुधार गरेको शिक्षा, विज्ञान तथा प्रविधि मन्त्री गिरिराजमणि पोखरेलले बताए ।
