काठमाण्डौ: दक्षिण एसियाली खेलकुद १३ औं (साग) प्रतियोगिताको दशरथ रंगशाला त्रिपुरेश्वरमा भव्य समारोहकाबीच उद्घाटन भएको छ ।
आइतबार बेलुका राजधानीको त्रिपुरेश्वरस्थित दशरथ रंगशालामा राष्ट्रपति विद्यादेवी भण्डारीले सागको औपचारिक उद्घाटन गरेकी हुन् ।
सहभागी मुलुकका खेलाडीको मार्च पासबाट शुरु भएको उक्त समारोहको राष्ट्रपतिबाट प्रतियोगिता उद्घाटन भएको घोषणा भइरहँदा आतशबाजी र पटका पड्काएर समारोहलाई थप आकर्षक र मनोरञ्जनात्मक बनाइएको थियो ।
काठमाडौं, पोखरा र जनकपुरमा आजदेखि २४ गतेसम्म सञ्चालन हुने उक्त प्रतियोगिताका माध्यमबाट नेपालको इज्जत, प्रतिष्ठा र खेल क्षेत्रको गौरव बढाउने विश्वास गरिएको छ । तयारी समितिका संयोजक रिमबहादुर रानाभाटले साग खेल प्रतियोगितामा नेपालबाट ५ सय ९४ खेलाडीले प्रतिष्पर्धा गर्ने जानकारी दिए ।
साग अन्तगर्तका खेल काठमाडौ, ललितपुर पोखरा र जनकपुरमा हुँदैछन् । साग खेलमा यसपटक ३ सय १७ स्वर्ण पदक, ३ सय १७ रजत र ४ सय ८१ वटा कास्य पदकका लागि प्रतिस्र्धा हुनेछ । ।
सागलाई सफल तुल्याउन करिब १८ हजार सुरक्षाकर्मी र ५०० स्वयंसेवक परिचालन गरिएको छ । सन् १९८४ मा स्थापना भएको सागको १३औँ शृङ्खलासम्म आइपुग्दा नेपालले यसअघि दुई प्रतियोगिता सफलतापूर्वक सम्पन्न गरिसकेको छ ।
उपराष्ट्रपति नन्दबहादुर पुन, प्रधानन्यायाधीश चोलेन्द्रशमशेर राणा, नेकपाका अध्यक्ष पुष्पकमल दाहाल, पूर्वप्रधानमन्त्री माधवकुमार नेपाल लगायतका विशिष्ट महानुभाव साग उद्घाटन समारोह कार्यक्रम अवलोकनका लागि रङ्गशाला पुगेका छन् ।

