काठमाण्डौं: सशस्त्र प्रहरीको एपिएफ क्लब सातौं प्रधानसेनापति कप महिला फुटबलको विजेता बनेको छ।
भद्रकालीस्थित नेपाली सेनाको तालिम केन्द्रमा भएको फाइनल खेलमा आयोजक त्रिभुवन आर्मी क्लबमाथि २-० गोल अन्तरको जित निकाल्दै एपिएफले पाँचौ पटक उपाधि आफ्नो पक्षमा पारेको हो । एपिएफको जितमा सरु लिम्बू र रेखा पौडेलले गोल गरिन् ।
खेलको ५ औं मिनेटमा सरुले सुरुवाती अग्रता दिलाएकी थिइन् । खेल सकिन १ मिनेट बाँकी रहेको अवस्थामा रेखाले गोल गरेपछि एपिएफले उपाधिसँगै ३ लाख रुपैयाँ सुरक्षित गरेको हो । उप-विजेता आर्मीले १ लाख ५० हजार प्राप्त गर्योु ।
यो जितसँगै एपिएफले लगातार ३ पटक आर्मीलाई फाइनलमा हराउँदै उपाधि आफ्नो पक्षमा पारेको हो । यसअघि पाँचौ र छैटौ प्रधानसेनापति कपको फाइनलमा आर्मीलाई एपिएफले हराएको थियो।
सेमिफाइनलमा स्थान बनाउन सफल बनेको नेपाल पुलिस क्लब र भुटानी राष्ट्रिय टोलीले समान ५०/५० हजार प्राप्त गरे । लिग चरणको खेलमा समेत एपिएफले आर्मीमाथि ४-२ गोल अन्तरको जित निकालेको थियो ।
उपविजेता टिमकी दिपा राई सर्वोत्कृष्ट खेलाडी घोषित भइन् । उनले स्कुटर प्राप्त गरिन्।
एपिएफकी सावित्रा भण्डारी प्रतियोगिताको उत्कृष्ट फरवार्ड घोषित भइन् ।
त्यसैगरी एपिएफकी एन्जिला तुम्वापो सुव्वा उत्कृष्ट गोलकिपर, एपिएफकै जनक सिंह उत्कृष्ट प्रशिक्षक, आर्मीकी पूजा राना उत्कृष्ट डिफेन्डर र भुटानकी पेमा छोडेन छिरिङ उत्कृष्ट मिडफिल्डर घोषित हुँदै जनही १०/१० हजार प्राप्त गरे।
उदयमान खेलाडी आर्मीकी विमला विक घोषित भइन् । उनलाई सैनिक श्रीमती संघले नगद २५ हजार प्रदान गर्यो ।
मंसिर २९ गतेबाट सुरु भएको प्रतियोगितामा २ विदेशी टोलीसहित ८ टिमको सहभागिता रहेको थियो।
