काठमाण्डौ: विदेशमा पाइने काम, तलब र सेवा सुविधाको बारेमा बुझ्न एजेण्टको भर पर्नुपर्ने र म्यानपावर धाउन पर्ने समस्याको अन्त्य भएको छ ।
वैदेशिक राेजगार विभागले सुरु गरेको वैदेशिक रोजगार सूचना व्यवस्थापन प्रणालीमा देशभरका म्यानपावर कम्पनीले विदेशी रोजगारदाताबाट ल्याएको मागको विवरण राख्न थालेपछि घरमै बसेर काम खोज्न र आवेदन दिन सकिने भएको छ ।
आफू जाने देश र आफूले गर्न चाहेको काम अब घरमै बसेर खोज्न र त्यही कामको लागि आवेदन दिन सकिन्छ ।
यो व्यवस्था लागू भएसँगै अब म्यानपावर कम्पनीले डिमाण्ड हुँदा पनि श्रमिकलाई छैन भन्ने, एजेण्टले पैसा उठाएर दिएकाको मात्र फारम भरिदिने, अन्तर्वार्तामा सहभागी गराउने अवस्थाको अन्त्य हुने विभागको विश्वास छ ।
