काठमाण्डौं: चीनको उहान सहरबाट उद्धार गरेर नेपाल ल्याएका १ सय ७५ जनाको घाँटीको र्याल (थ्रोट स्वाव)को परीक्षण गरिने भएको छ।
टेकुस्थित राष्ट्रिय जनस्वास्थ्य प्रयोगशालाबाट खटिएका १० जना स्वास्थ्यकर्मीको टोलीले आइतबार ४ घण्टा लगाएर घाँटीको र्याल (थ्रोट स्वाव) संकलन गरेका थिए।
प्रयोगशालाकी निर्देशक डा.रुना झाका अनुसार ‘हाम्रो एक टोलीले ‘स्वाव’ संकलन गरेका थियौँ। आज मंगलवारदेखि प्रयोगशालामा १ सय ७५ जनाकै स्वावको परीक्षण गरिँदैछ,’।
‘स्वाव परीक्षणमा ६ जना स्वास्थ्यकर्मी खटिँदैछन्।’ परीक्षण सकिएपछि स्वास्थ्य मन्त्रालयमा रिपोर्ट पठाइने उनले बताइन्।
बुधबारसम्म रिपोर्ट आइसक्ने स्वास्थ्य तथा जनसंख्या मन्त्रालयका सहप्रवक्ता सागर दाहलले जानकारी दिए।
