काठमाण्डौः प्रमुख प्रतिपक्ष दल नेपाली कांग्रेसले मंगलबारदेखि देशैभर दोस्रो चरणको राष्ट्रिय जागरण अभियान शुरू गरेको छ ।
पहिलो चरणको जागरण अभियान प्रभावकारी बनाउन नसकेको आरोप लागिरहेको बेला कांग्रेसले देशभरका ३३० वटै प्रदेश स्तरीय निर्वाचन क्षेत्र लक्षित दोस्रो चरणको राष्ट्रिय जागरण अभियान शुरू गरेको जनाएको छ ।
दोस्रो चरणको जागरण अवधिभर बढ्दो महँगी, भ्रष्टाचार वाइडबडी, न्यारोबडी प्रकरण, बढ्दो महिला हिंसा, बलात्कार र हत्या, सरकारले ल्याएका अलोकतान्त्रिक विधेयक तथा कम्युनिस्ट सरकारको कुशासनविरुद्ध हुने कांग्रेसले जनाएको छ ।
केन्द्रीय तहका नेतादेखि वडा तहसम्मका नेता, काँग्रेस र जनता तथा कांग्रेस र मतदाताबीच संवाद र सम्पर्क स्थापित गर्ने लक्ष्यका साथ शुरू गरेको अभियान असोज ०७ गतेसम्म देशैभर एकसाथ चल्नेछ । जननेता बीपी कोइरालाको १०६ औं जन्म जयन्तीको दिन पारेर कांग्रेसले अभियानको सुरुवात गरेको छ ।
जागरण अभियानका क्रममा ३३० वटै निर्वाचन क्षेत्रहरूमा केन्द्रीय प्रतिनिधिहरू परिचालन हुनेछन् । अभियानको अन्तिम दिन असोज ०७ गते जिल्लास्तरीय विरोध प्रदर्शनहरू समेत सञ्चालन गर्ने कार्यसूची रहेको छ । उक्त अभियान समापन सँगै कांग्रेसले पुनः तेस्रो चरणको अभियान स्वरूप पुष ७ बाट १६ सम्म अर्थात् १० दिन ७५३ वटै स्थानीय तहमा गर्ने भावी योजना समेत लिएको छ ।
