काठमाण्डौः निर्वाचन आयोगले यही मंसिर १४ गते हुने प्रतिनिधि सभा सदस्य, प्रदेश सभा सदस्य तथा स्थानिय तहका रिक्त पदहरूका लागी हुने उपनिर्वाचन प्रयोजनको निम्ति निर्वाचन कार्यक्रम सार्वजनिक गरेको छ ।
उपनिर्वाचन हुने ३७ जिल्लाका १५४ वडा कार्यालयहरूमा रहने सहायक नाम दर्ता अधिकारीको कार्यालयमा मतदाता नामावली अद्यावधिक (दावी विरोध) कार्यक्रम असोज १ गतेदेखी सञ्चालन हुने विज्ञप्ती मार्फत जनाएको छ ।
आयोगद्वारा जारी विज्ञप्ति अनुसार यही असोज १ गते मतदाता नामावली प्रकाशन गर्ने, असोज २ गतेदेखी ५ गतेसम्म मतदाता नामावली सच्याउने तथा नाम हटाउने, असोज ७ गतेसम्म उजुरी परेका निवेदन उपर छानविन गर्ने, असोज ८ गते मतदाता नामावली हटाइएको सूचना सम्बन्धित वडा कार्यालयमा टाँस्ने, असोज ८ गते नै अन्तिम मतदाता नामावली प्रकाशन गर्ने र असोज ८ गतेदेखी १० गतेसम्म अद्यावधिक गरिएको मतदाता नामावली सम्बन्धित जिल्ला निर्वाचन कार्यालयहरूमा बुझाउने कार्यक्रम रहेको जनाएको छ । एउटा संघीय निर्वाचन क्षेत्र, तीन वटा प्रदेश सभा र ४६ वटा स्थानीय तह (गाउँ/नगर) मा उपनिर्वाचन हुँदैछ ।
