काठमाडौं : प्रतिबन्धित नेकपा (विप्लव) समुहका स्याङ्जा सेक्रेटरी गोकुल पराजुली सहित तीन जनालाई प्रहरीले उच्च अदालतको गेटबाहिरबाट पुनः पक्राउ गरेको छ ।
उच्च अदालत पोखराले साधारण तारेखमा रिहा गर्न आदेश दिए लगत्तै रिहा भएका गोकुल पराजुली लगायत तीनैजना जनालाइ प्रहरीले पुनः पक्राउ गरेको हो । यसरी पक्राय गर्ने क्रममा मिसिरा नेपाली भने प्रहरी घेराउबाट भाग्न सफल भएकी छिन् । एनसेल टावरमा क्षति पुर्याएको अभियोगमा जिल्ला अदालत स्याङ्जाले दुई लाख रूपैयाँ प्रति व्यक्ति र विष्फोटक पदार्थ सम्बन्धि मुद्दामा प्रति व्यक्ति दुई लाख २० हजार धरौटी लिएर तारेखमा छाड्न आदेश दिएको थियो ।
जिल्ला सेक्रेटरी गोकुल पराजुली लगायतका चार जना नेता जिल्ला अदालतले तोकेको धरौटी राख्न इन्कार गरेपछि उनिहरूलाइ कारागार चलान गरिएको थियो । जिल्ला कारागार शाखा स्याङ्गजा चलान गरिएका अन्य नेताहरुमा जिल्ला जनसरकार प्रमुख सागर अर्याल, अखिल नेपाल ट्रेड युनियन महासंघ क्रान्तिकारी स्याङ्गजा संयोजक गोबिन्द ओली र महिला नेतृ मिसिरा नेपाली रहेका छन् ।
स्याङ्ग्जा जिल्ला अदालतको उक्त आदेश बदरको माग गर्दै उच्च अदालत पोखरामा रिट निवेदन दर्ता गरेका थिए । उक्त रिट बारे फैसला गर्दै उच्च अदालत पोखराले उक्त धरौटी रकम माग अस्वाभाविक भन्दै साधारण तारेखमा छाड्न आदेश दिएको थियो ।
