काठमाण्डौः चिनियाँ राष्ट्रपति सि जिनपिङ्ग नेपाल भ्रमणमा आउने भएका छन् । राष्ट्रपति सि जिनपिङ्ग यही असोज २७ गते नेपाल भ्रमणमा आउने लगभग पक्का भएको हो ।
त्यसअघि उनी भारत-चीन अनौपचारिक सम्मेलनका लागी भारत जाने कार्यक्रम रहेको छ । भारतको तामिलनाडुमा हुने सम्मेलन सकेर बेइजिङ फर्किनुअघि करिब ९ घण्टाका लागि काठमाडौं भ्रमणमा आउने कार्यक्रम रहेको छ । राष्ट्रपति सि को उक्त भ्रमणलाइ लिएर सरकारले सुरक्षा सर्तकता अपनाउन आफ्ना मातहतका निकायलाई निर्देशन दिएको जनाएको छ ।
राष्ट्रपति सि को भ्रमण अगावै सुरक्षाको योजना बनाउन चिनिया कम्युनिष्ट पार्टीको विदेश विभागको एक प्रतिनिधीमण्डल नेपाल भ्रमणमा आउनेछ । प्रतिनिधिमण्डलले सरकार लगायत प्रतिपक्ष दलका नेताहरूसँग छुट्टाछुट्टै भेटी राष्ट्रपति सि को भ्रमणमा गर्न सकिने सम्झौताहरूका बिषयहरूमा समेत छलफल गर्नेछ ।
राष्ट्रपति सि को भ्रमणका बेला महत्वाकांक्षी केरुङ-रसुवागढी-काठमाडौं रेलमार्ग विस्तार, तेल पाइपलाइन लगायत महत्वपूर्ण सम्झौताको तयारी भइरहेको छ । यसैगरी नेपालले चीनलाई उपहार स्वरूप दुईवटा गैंडा पनि सोही बेला हस्तान्तरण गर्ने कार्यक्रम रहेको जनाइएको छ ।
