काठमाण्डौः यस वर्षको दशैँ, तिहार, छठ लगायत चाडपर्वका अवसरमा प्रमुख दुई दलले राजधानीमा चियापान कार्यक्रमको आयोजना गर्ने भएका छन् ।
बडादशैंको अवसरमा नेपाली काँग्रेसले असोज २६ गते र सत्तारूढ नेकपाले असोज २९ गते चियापान कार्यक्रमको आयोजना गर्ने भएको हो ।
कोजाग्रत पूर्णिमाको दिन पारेर काँग्रेसले असोज २६ गते आईतबार चियापान कार्यक्रम आयोजना गर्न लागेको प्रवक्ता विश्वप्रकाश शर्माले बताएका छन् ।
यसैगरी सत्तारूढ नेकपाले पनि असोज २९ गते चियापान कार्यक्रम गर्न लागेको पार्टीका महासचिव विष्णु पौडेलले बताएका छन् ।
काँग्रेसले सो दिन अपरान्ह एक बजेदेखि साँझ ५ बजेसम्म चियापान कार्यक्रम सञ्चालन हुने बताएको छ । यता सत्तारूढ दल नेकपाले भने चियापानको लागि स्थान छनोट भइनसकेको बताएको छ ।
काँग्रेस प्रवक्ता विश्व प्रकाश शर्माले मंगलबार पार्टी केन्द्रीय कार्यालय सानेपामा आयोजित पत्रकार सम्मलेनमा काठमाडौं, ललितपुर र भक्तपुर जिल्लाको चियापान कार्यक्रम पार्टी केन्द्रीय कार्यालय सानेपामा हुने र अन्य जिल्लाको चियापान कार्यक्रमको संयोजन सम्बन्धित जिल्ला कार्य समितिले गर्ने जानकारी दिइसकेका छन् ।
नेपाली काँग्रेसका संस्थापक नेता बीपी कोइरालाले २०३४ सालबाट सुरु गरेको चियापान कार्यक्रमलाई काँग्रेसले निरन्तरता दिदै आएको छ । यता सत्तारूढ नेकपाले भने तत्कालिन नेकपा एमाले र माओवादी केन्द्रबीच पार्टी एकता भएपछिको यो दोस्रो पटक चियापान कार्यक्रमको आयोजना गर्दैछ ।
