काठमाण्डौः गोपाल किराँती नेतृत्वको नेकपा (माओवादी केन्द्र) ले लिपुलेकस्थित नेपाली भूमि फिर्ताको औपचारिक पहल गर्न माग गरेको छ ।
नेकपा (माओवादी केन्द्र)का अध्यक्ष गोपाल किराँतीले विहिबार एक प्रेश विज्ञप्ती जारी गरी चिनियाँ राष्ट्रपति सी जिनपिङको नेपाल भ्रमणको सिलसिलामा लिपुलेकस्थित नेपाली भूमि फिर्ताको औपचारिक पहल गर्न माग गरेको हो ।
अध्यक्ष किराँतीले जारी गरेको विज्ञप्तिमा ‘राष्ट्रपति सीको भ्रमणका क्रममा कस्मेटिक काठमाडौं होइन, राष्ट्रिय प्रतिष्ठा कायम हुनेगरी सुरक्षा व्यवस्था र लिपु लेकस्थित नेपाली भूमि फिर्ताको औपचारिक पहल गर्न हाम्रो पार्टी सरकारसँग गम्भीर माग गर्दछ’ भनिएको छ ।
साथै सो पार्टीले हिन्द प्रसान्त रणनितिमा (इन्डो प्यासिफिक रणनीति)लाई नेपाल र नेपाली जनता विरोधी भन्दै त्यसको संलग्नता खारेजी गर्न आग्रह गरेको छ ।
यसैगरी पार्टीले निवर्तमान सभामुख कृष्णबहादुर महरामाथि लगाइएको बलात्कारको प्रयासको आरोपमा पनि धारणा सार्वजनिक गरेको छ ।
पार्टीले रोशनी-महराको घटनामा आधा सभामुख कृष्ण बहादुर महराको कमजोरी रहेको र आधा षडयन्त्र भन्ने सूचनाहरु प्राप्त भएको बताएको छ ।
साथै उक्त विज्ञप्तिमा ‘विगत लामो समय क्रमशः सभामुख रहेका सुवास नेम्वाङ र ओनसरी घर्ती नै संसद सचिवालयको कर्मचारीबारे जानकार तथा दुरुपयोगकर्ता हुन सक्ने विश्लेषणहरु छन् । यस सम्बन्धमा हाम्रो पार्टी बृहत जनस्तरीय छानबिनको माग गर्दछ’ भनिएको छ ।
