काठमाडौँ । गोरखाको बूढीगण्डकी नदीमा आएको बाढीबाट प्रभावित ४९ जनालाई नेपाली सेनाले सकुशल उद्धार गरेको छ। आइतबार आएको बाढीपछि विभिन्न स्थानमा फसेका उनीहरूको सेनाले हेलिकोप्टर र स्थलमार्गबाट उद्धार गरेको हो।
नेपाली सेनाका अनुसार उद्धार कार्यका लागि एमआई-१७ सहित चारवटा हेलिकोप्टर परिचालन गरिएको थियो। हेलिकोप्टरका साथै स्थलमार्गबाट खटिएको सेनाको टोलीले बाढी प्रभावित क्षेत्रमा पुगेर जोखिममा परेका व्यक्तिहरूलाई सुरक्षित स्थानमा स्थानान्तरण गरेको हो।
उद्धार गरिएकामा शिशु तथा बालबालिकासमेत रहेका छन्। त्यस्तै, बाढी प्रभावित क्षेत्रमा फसेका एक विदेशी नागरिकको पनि सकुशल उद्धार गरिएको सेनाले जनाएको छ।
बूढीगण्डकी नदीमा आएको बाढीका कारण प्रभावित क्षेत्रमा उद्धार तथा राहत कार्यलाई प्राथमिकता दिइएको छ। बाढीले प्रभावित बनाएका स्थानमा फसेका अन्य व्यक्तिहरूको अवस्था पहिचान गर्न र सम्भावित जोखिममा रहेकाहरूलाई सुरक्षित स्थानमा पुर्याउन सुरक्षा निकाय परिचालन भइरहेका छन्।
नेपाली सेनाले अन्य सुरक्षा निकायसँग समन्वय गरी प्रभावित क्षेत्रमा थप खोज तथा उद्धार कार्य जारी राखेको जनाएको छ। बाढी प्रभावित क्षेत्रमा उद्धार कार्यलाई प्रभावकारी बनाउन आवश्यक जनशक्ति तथा स्रोतसाधन परिचालन गरिएको छ।
नदीमा पानीको बहाव बढ्न सक्ने जोखिम रहेकाले तटीय क्षेत्रका बासिन्दालाई सतर्क रहन र सुरक्षित स्थानमा बस्न आग्रह गरिएको छ।
