काठमाडौं । प्रधानसेनापति अशोकराज सिग्देल मित्रराष्ट्र बेलायतको औपचारिक भ्रमण सम्पन्न गरी आज स्वदेश फर्किनुभएको छ।
प्रधानसेनापति सिग्देललाई त्रिभुवन अन्तर्राष्ट्रिय विमानस्थलमा बलाधिकृत रथी प्रदीपजङ्ग केसीले स्वागत गर्नुभएको थियो।
बेलायत भ्रमणका क्रममा प्रधानसेनापति सिग्देलले बेलायती सेनाध्यक्ष जनरल सर रोय वाकरलगायत उच्च सैनिक अधिकारीहरूसँग शिष्टाचार भेटवार्ता गर्नुभएको थियो। भेटवार्ताका क्रममा दुई देशबीच लामो समयदेखि कायम रहेको सैनिक सम्बन्ध र आपसी सहकार्यलाई थप सुदृढ बनाउने विषयमा छलफल भएको जनाइएको छ।
भ्रमणका क्रममा उहाँले वेल्सको ब्रेकनस्थित इन्फ्यान्ट्री ब्याटल स्कुलको अवलोकन गर्नुका साथै अन्तर्राष्ट्रिय सैनिक अभ्यास ‘एक्सरसाइज क्याम्ब्रियन पट्रोल–२०२६’ को निरीक्षण गर्नुभएको थियो।
उक्त अभ्यासमा स्वर्ण पदक प्राप्त गर्न सफल नेपाली सैनिक टोलीका सकलदर्जालाई प्रधानसेनापति सिग्देलले प्रधानसेनापति प्रशंसा निशानबाट सुशोभितसमेत गर्नुभएको थियो।
नेपाली सेनाको जनसम्पर्क तथा सूचना निर्देशनालय, जङ्गी अड्डाका अनुसार प्रधानसेनापति सिग्देलको यस भ्रमणले नेपाल र बेलायतबीच सदियौँदेखि कायम रहँदै आएको सौहार्दपूर्ण द्विपक्षीय सैनिक सम्बन्धलाई थप सुमधुर र प्रगाढ बनाउन सहयोग पुगेको छ।
