काठमाडौं । संयुक्त राष्ट्रसङ्घको आह्वानमा शान्ति स्थापना कार्यका लागि दक्षिण सुडानमा तैनाथ नेपाली सेनाको शान्ति सैनिक टोली फेरबदल गरिएको छ।
नेपाली सेनाको जनसम्पर्क तथा सूचना निर्देशनालयले आज जारी गरेको प्रेस नोटअनुसार, दक्षिण सुडानमा सञ्चालित संयुक्त राष्ट्रसङ्घीय मिसन (युनाइटेड नेसन्स मिसन इन साउथ सुडान–UNMISS) मा तैनाथ श्री नयाँ गोरख गण (शान्ति सेना) १५औँ डफ्फालाई बदली गर्न श्री नारायणदल गण (शान्ति सेना) १६औँ डफ्फाका २०३ जना शान्ति सैनिकहरूको दोस्रो तथा अन्तिम टोली बुधबार मिसन क्षेत्रमा प्रस्थान गरेको छ।
यससँगै दक्षिण सुडानमा शान्ति स्थापना कार्यका लागि खटिने नयाँ टोलीको परिचालन प्रक्रिया अघि बढेको छ। नेपाली सेनाले संयुक्त राष्ट्रसङ्घीय शान्ति मिसनमा आफ्नो सहभागितामार्फत अन्तर्राष्ट्रिय शान्ति, सुरक्षा र स्थायित्व कायम गर्ने कार्यमा योगदान दिँदै आएको छ।
यसैगरी, दक्षिण सुडानस्थित उक्त मिसनमा आफ्नो कार्यकाल सफलतापूर्वक सम्पन्न गरेका २०४ जना नेपाली शान्ति सैनिक बुधबार नै स्वदेश फर्किएका छन्।
संयुक्त राष्ट्रसङ्घीय शान्ति मिसनमा नेपाली सेनाको सहभागिता नेपालको अन्तर्राष्ट्रिय प्रतिबद्धता र शान्ति स्थापनामा योगदानको महत्त्वपूर्ण हिस्सा रहँदै आएको छ। नेपाली शान्ति सैनिकहरूले विभिन्न मुलुकमा द्वन्द्व व्यवस्थापन, नागरिक सुरक्षालगायतका कार्यमा जिम्मेवारी निर्वाह गर्दै आएका छन्।
दक्षिण सुडानमा पनि नेपाली शान्ति सैनिकहरूले संयुक्त राष्ट्रसङ्घको म्यान्डेटअनुसार शान्ति स्थापना तथा सुरक्षासम्बन्धी जिम्मेवारी पूरा गर्दै आएका छन्।
