काठमाडौं । नेपाली सेनाले चाडपर्वलाई लक्षित गरी बहालवाला सैनिक तथा उनीहरूका आश्रित परिवारका १ हजार २१६ जनालाई घरसम्म पुर्याएको छ ।
सेनाका अनुसार कल्याणकारी सहुलियत सेवाअन्तर्गत उनीहरूलाई हवाई उडान तथा सवारीसाधनमार्फत गन्तव्यसम्म पुर्याइएको हो । चाडपर्वका बेला सैनिक कर्मचारी र उनीहरूका परिवारलाई आवतजावतमा सहजता प्रदान गर्ने उद्देश्यले उक्त सेवा सञ्चालन गरिएको सेनाले जनाएको छ ।
नेपाली सेनाले हरेक वर्ष चाडपर्वको समयमा बहालवाला सैनिक तथा उनीहरूका आश्रित परिवारलाई लक्षित गरी यस्तो सेवा उपलब्ध गराउँदै आएको छ । यस व्यवस्थाले चाडपर्व मनाउन घर जाने सैनिक परिवारलाई यात्रा सहज बनाउन सहयोग पुग्ने अपेक्षा गरिएको छ ।
सेनाले कल्याणकारी सहुलियत सेवामार्फत सैनिक कर्मचारी तथा उनीहरूका परिवारलाई आवश्यकताअनुसार विभिन्न सुविधा प्रदान गर्दै आएको छ । यसपटक पनि हवाई उडान र सवारीसाधन दुवै माध्यम प्रयोग गरी १ हजार २१६ जनालाई घरसम्म पुर्याइएको हो ।
सेनाले भने यस सेवामार्फत कुन–कुन गन्तव्यमा कति जनालाई पुर्याइयो भन्ने विस्तृत विवरण सार्वजनिक गरेको छैन ।
