सुलीकोट (गोरखा), असोज ३१ गते । बडादसैँको सातौँ दिन शनिबार गोरखा दरबारको दसैँघरबाट काठमाडौँस्थित हनुमानढोका दरबारमा फूलपातीसहितको डोली पठाइएको छ ।
शुभसाइतअनुसार बिहान ९ बजे विधिपूर्वक पूजाअर्चना गरी फूलपातीसहितको डोली काठमाडौँ पठाइएको हो । गोरखा दरबारका नायब सुब्बा हरि सारूका अनुसार दरबारका सुसारेहरूले फूलपातीसहितको डोली बोकेर ल्याएपछि सरकारी गाडीमार्फत काठमाडौँ पठाइएको हो ।
फूलपाती बिदाइका क्रममा गोरखा दरबारको दसैँघरबाट बाजागाजासहित र्याली निकालिएको थियो । परम्परागत विधिअनुसार पूजाअर्चना गरी फूलपातीको डोली बिदाइ गरिएको गोरखाकाली मन्दिरका मूल पुजारी राजेन्द्र अर्यालले बताउनुभयो ।
गोरखाबाट पठाइएको फूलपाती हनुमानढोका दरबारमा पुर्याएपछि शनिबार साँझ हर्षबढाइँका साथ भित्र्याउने प्रचलन रहेको उहाँले जानकारी दिनुभयो । गोरखा दरबारको दसैँघरमा पनि शनिबार साँझ हर्षबढाइँसहित फूलपाती भित्र्याउने कार्यक्रम रहेको छ ।
ऐतिहासिक मान्यताअनुसार तत्कालीन गोरखाका राजा पृथ्वीनारायण शाहले काठमाडौँको हनुमानढोका दरबारबाट राजकाज सुरु गरेपछि गोरखा दरबारबाट हरेक वर्ष बडादसैँको सातौँ दिन फूलपातीसहितको डोली काठमाडौँ पठाउने परम्परा चल्दै आएको छ । यस परम्पराले गोरखा दरबार र हनुमानढोका दरबारबीचको ऐतिहासिक तथा सांस्कृतिक सम्बन्धलाई निरन्तरता दिँदै आएको छ ।
फूलपाती बिदाइ कार्यक्रममा जिल्ला समन्वय समिति गोरखाका प्रमुख मोहनबहादुर थापा मगर, गोरखा नगरपालिकाका प्रमुख कृष्णबहादुर राना मगर, प्रमुख जिल्ला अधिकारी धर्मेन्द्रकुमार मिश्रलगायत जनप्रतिनिधि तथा सरकारी अधिकारीहरूको सहभागिता थियो । उहाँहरूले परम्परागत विधिअनुसार फूलपातीको बिदाइ गर्नुभएको थियो ।
दसैँको धार्मिक तथा सांस्कृतिक महत्त्वसँग जोडिएको फूलपाती गोरखामा विशेष परम्पराका रूपमा मनाइँदै आएको छ ।
