सदाबहार खबरको रफ्तार ....
मंग्सिर ५, २०८३ शनिबार
November 21, 2026
होमपेज
राजनीति बिचार अन्तरबार्ता स्वास्थ्य शिक्षा अर्थ/बजार खेलकुद अन्तराष्ट्रिय ☰

अमेरिकी मध्यावधि चुनावमा डेमोक्रेटको अग्रता

२०८३ कार्तिक १८, बुधबार
शेयर गर्नुहोस:
फन्ट परिवर्तन गर्नुहोस: अ अ अ

वासिङ्टन, १८ कात्तिक (रासस/एएफपी) : अमेरिकी मध्यावधि चुनावमा डेमोक्रेटिक पार्टीले प्रारम्भिक सफलता हासिल गर्दै रिपब्लिकनको एक सिनेट सिट जितेको छ । रिपब्लिकनको बलियो पकड मानिएका क्षेत्रमा समेत डेमोक्रेटिक पार्टीले प्रभाव विस्तार गरेपछि राष्ट्रपति डोनाल्ड ट्रम्पमाथि राजनीतिक दबाब बढ्ने सङ्केत देखिएको छ ।

डेमोक्रेटहरूले सिनेटका महत्त्वपूर्ण सिट सुरक्षित राख्नुका साथै जर्जियाको गभर्नर पदमा पनि सफलता हासिल गर्ने अनुमान गरिएको छ । यद्यपि, कङ्ग्रेसका दुवै सदनको नियन्त्रण कसले लिने भन्ने विषयमा अन्तिम निर्णय भइसकेको छैन ।

ट्रम्पको दोस्रो कार्यकालप्रति जनमत परीक्षणका रूपमा हेरिएको यस चुनावमा जीवनयापनको बढ्दो लागत, भन्सार शुल्क र इरानविरुद्धको अमेरिकी युद्ध प्रमुख मुद्दा बनेका छन् । युद्धका कारण इन्धनको मूल्य तीव्र रूपमा बढेको विषयले राष्ट्रपति र उहाँको पार्टीमाथि दबाब थपेको छ ।

डेमोक्रेटहरूले उत्तरी क्यारोलिनामा रिपब्लिकनको नियन्त्रणमा रहेको प्रतिनिधिसभाको एक सिट जितेका छन् । उक्त क्षेत्रमा ट्रम्पले सन् २०२४ को राष्ट्रपतीय चुनावमा सहज जित हासिल गर्नुभएको थियो । फ्लोरिडामा पनि निर्वाचन क्षेत्रको पुनः निर्धारणबाट रिपब्लिकनले अपेक्षा गरेअनुसार लाभ लिन नसक्ने सङ्केत देखिएको छ ।

जर्जियामा एटलान्टाकी पूर्वमेयर केइशा ल्यान्स बटम्सले गभर्नर पद जित्ने अनुमान गरिएको छ । उहाँ निर्वाचित भए अमेरिकाको पहिलो अश्वेत महिला गभर्नर बन्नुहुनेछ । यससँगै जर्जियामा २४ वर्षदेखि कायम रिपब्लिकन शासनको अन्त्य हुनेछ ।

यद्यपि, फ्लोरिडामा ट्रम्पको समर्थन प्राप्त बायरन डोनाल्ड्सले गभर्नर पदको चुनाव जित्नुभएको छ । उहाँ निर्वाचित भए राज्यको पहिलो अश्वेत गभर्नर बन्नुहुनेछ । रिपब्लिकन एशले मूडीले पनि सिनेटको आफ्नो सिट सुरक्षित राख्नुभएको छ ।

उत्तरी क्यारोलिनामा डेमोक्रेट रोय कुपरले ट्रम्पद्वारा छनोट गरिएका पूर्वरिपब्लिकन राष्ट्रिय समिति अध्यक्ष माइकल ह्वाटलीलाई पराजित गर्नुभएको छ । ट्रम्पलाई लगातार तीन पटक समर्थन गरेको यस राज्यमा कुपरले जीवनयापनको लागत घटाउने प्रतिबद्धतासहित चुनावी अभियान चलाउनुभएको थियो । उहाँले राष्ट्रपतिसँग मतभेद राख्दै आउनुभएका अवकाशप्राप्त रिपब्लिकन सिनेटर थोम टिलिसको स्थान लिन प्रतिस्पर्धा गर्नुभएको थियो ।

जर्जियामा सन् २०२८ को राष्ट्रपतीय चुनावका सम्भावित उम्मेदवारका रूपमा हेरिनुभएका डेमोक्रेटिक सिनेटर जोन ओसोफले पनि आफ्नो रिपब्लिकन प्रतिद्वन्द्वीलाई पराजित गर्नुभएको छ । त्यस्तै, न्यु ह्याम्पसायरमा क्रिस पप्पास निर्वाचित हुनुभएको छ । उहाँ अमेरिकी सिनेटमा निर्वाचित हुने पहिलो खुलेर समलिङ्गी पहिचान सार्वजनिक गर्नुभएका व्यक्ति बन्नुभएको छ ।

चुनावअघि सिनेटका कुल १०० सिटमध्ये रिपब्लिकनसँग ५३ र डेमोक्रेटसँग ४७ सिट थिए । सिनेटको नियन्त्रण लिन डेमोक्रेटहरूले कम्तीमा चार सिटको खुद लाभ हासिल गर्नुपर्ने थियो । प्रतिनिधिसभाका सबै ४३५ सिटमा भएको चुनावमा बहुमत प्राप्त गर्न उनीहरूले कम्तीमा तीन सिट आफ्नो पक्षमा पार्न आवश्यक थियो ।

प्रतिनिधिसभाका डेमोक्रेटिक नेता हाकिम जेफ्रीजले देश ‘दिशाको नाटकीय परिवर्तनको सँघारमा’ रहेको बताउनुभएको छ ।

डेमोक्रेटहरूले प्रतिनिधिसभामा बहुमत हासिल गरे ट्रम्पका विधायी योजनाहरू अवरुद्ध गर्न र इरानसँगको युद्ध, आप्रवासी निष्कासन तथा कथित भ्रष्टाचारबारे प्रशासनको छानबिन गर्न सक्नेछन् । सिनेटमा पनि नियन्त्रण हासिल गरे न्यायाधीश तथा वरिष्ठ प्रशासनिक अधिकारीको नियुक्ति रोक्न सक्नेछन् । यसले ट्रम्पको कार्यकालका अन्तिम दुई वर्षमा शासन सञ्चालन गर्ने क्षमतामा महत्त्वपूर्ण प्रभाव पार्न सक्छ ।

मतदाताका लागि जीवनयापनको बढ्दो खर्च प्रमुख चिन्ताको विषय बनेको छ । लस एन्जलसका २४ वर्षीय मतदाता टेलर कुकले भाडा, खाद्यान्न, उपयोगिता सेवाका बिल र सम्पत्ति कर बढिरहेको बताउँदै यी खर्च घटाउन काम गर्ने प्रतिनिधि कङ्ग्रेसमा चाहिएको एएफपीलाई बताउनुभयो ।

मङ्गलबार अन्तिम टेलिभिजन उपस्थितिका क्रममा ट्रम्पले भन्सार शुल्क, आप्रवासन नियन्त्रण र इरानविरुद्धको सैन्य अभियानको बचाउ गर्नुभएको थियो । ‘हामीले अमेरिकालाई महान् राख्नुपर्छ । अहिले हामी महान् छौँ । दुई वर्षअघि हामी भयावह अवस्थामा थियौँ’, ८० वर्षीय ट्रम्पले फक्स न्युजसँग भन्नुभएको थियो ।

यसैबीच, मियामीका ७० वर्षीय रिपब्लिकन मतदाता मारु रेस्ट्रेपोले डेमोक्रेटहरू ‘अत्यधिक समाजवादी’ बनेको टिप्पणी गर्नुभएको थियो । यसले चुनावी अभियानमा देखिएको वैचारिक विभाजनलाई प्रतिबिम्बित गरेको छ ।

प्रतिकूल चुनावी परिणाम ट्रम्पले स्वीकार गर्नुहुने हो वा होइन भन्ने विषयमा पनि अनिश्चितता कायम छ । उहाँले यसअघि चुनावमा धाँधली भएको अप्रमाणित दाबी गर्दै सन् २०२० को राष्ट्रपतीय चुनावको नतिजा उल्ट्याउने प्रयास गर्नुभएको थियो ।

सोमबार सार्वजनिक पोडकास्टमा ट्रम्पले डेमोक्रेटहरूले कङ्ग्रेसको नियन्त्रण लिए आफूले सबै विषयमा भिटो प्रयोग गर्ने बताउनुभएको थियो । यद्यपि, उहाँले अन्ततः सहमतिका लागि वार्ता गर्न सक्ने सम्भावना पनि व्यक्त गर्नुभएको थियो ।

यो खबर पढेर तपाईलाई कस्तो महसुस भयो ?

तपाइको प्रतिक्रिया राख्नुहोस्

सम्बन्धित समाचार

युरेनियम विवादले इरान–अमेरिका वार्ता ठप्प

जीवाश्म इन्धनमा विवादले जलवायु वार्ता लम्बियो

भारतमा दूषित मदिरा सेवनबाट ११ जनाको मृत्यु

हर्मुजमा पौडी खेलेर युद्धको असर उजागर

फिलिपिन्समा विमानको आपत्कालीन अवतरण, सबै सुरक्षित

इरानमाथि थप सैन्य कारबाही रोक्ने प्रस्ताव अमेरिकी सिनेटबाट अस्वीकृत

हरेदी दलसँग गठबन्धन बन्ने लिबरम्यानको विश्वास

आर्थिक आत्मनिर्भरता र पारिवारिक जीवन सुरु गर्न युवालाई चुनौती बढ्दै : राष्ट्रसङ्घीय प्रतिवेदन

रोहिङ्ग्याको न्यायको आशा, घर फर्कने प्रतीक्षा

जीवाश्म इन्धनमा विवादले जलवायु वार्ता अन्योलमा

मुद्रास्फीति बढेपछि श्रीलङ्काले ब्याजदर बढायो

इरानको चेतावनी : सर्त मान, नत्र युद्धको सामना गर