काठमाण्डौं: प्रधानमन्त्रीको सचिवालयमा कार्यरत एकदर्जन सल्लाहकार र सहयोगीले राजीनामा दिएका छन् ।
प्रधानमन्त्री केपी शर्मा ओलीले राजिनामा दिन निर्देशन दिए लगत्तै उनीहरूले शुक्रबार एकाएक राजिनामा दिएका हुन् ।
मन्त्रिपरिषद्मा रहेका केही मन्त्रीहरूको कार्यशैलीप्रति असन्तुष्टि जनाँउदै आएका प्रधानमन्त्री केपी शर्मा ओलीले मन्त्रीपरिषद पुर्नगठन गर्ने पूर्वतयारी अनुरूप नयाँ ढंगले काम गर्नका लागि राजीनामा दिएर बाटो सहज पार्न सबै सल्लाहकारलाई यस्तो निर्देशन दिएको हुनसक्ने स्रोतको दाबी छ ।
राजिनामा दिनेहरूमा प्रधानमन्त्रीको प्रमुख राजनितिक सल्लाहकार विष्णु रिमाल, विदेश मामिला सल्लाहकार डा. राजन भट्टराई, जनसम्पर्क सल्लाहकार अच्युत मैनाली, स्वकीय सचिव इन्द्र भण्डारी रहेका छन् ।
प्रेस सल्लाहकार डा. कुन्दन अर्याल सूचना प्रविधि सल्लाहकार अस्गर अलीले पनि राजिनामा दिएका छन् । यसैगरी प्रधानमन्त्रीका प्रमुख स्वकीय सचिव राजेश बज्राचार्य, प्रेस विज्ञ चेतन अधिकारी र रामशरण बजगाईंले पनि राजिनामा दिएका छन्।
मन्त्रिपरिषद् पुनर्गठनको तयारीमा रहेका प्रधानमन्त्रीलाई सहज बनाउन भन्दै सचिवालयका सबै सदस्यले एकाएक राजीनामा दिएका हुन् । सचिवालय सदस्यहरुले मंसिरबाट लागू हुने गरी स्वच्छिक रुपमा राजीनामा दिएका हुन् ।
हालसम्म प्रधानमन्त्रीले सचिवालयका सबै सदस्यहरूको राजिनामा मागेर राखेकोले स्वीकृत हुन बाँकी रहेको बताइएको छ ।
