काठमाण्डौः सत्तारूढ नेपाल कम्युनिष्ट पार्टी (नेकपा) का अध्यक्ष प्रचण्डले भविष्यमा द्वन्द्व दोहोरिन नदिन सत्यतथ्य छानबिन गर्नैपर्ने बताएका छन् ।
नेकपा पार्टी केन्द्रीय कार्यालय धुम्बाराहीमा आईतबार बुद्धिमान पाख्रिनको १७ औँ स्मृतिका अवसरमा आयोजित कार्यक्रममा बोल्ने क्रममा यस्तो अभिब्यक्ति दिएका हुन् ।

द्वन्द्वमा जघन्य अपराध गर्ने दोषीलाई कारवाही र पीडितलाई परिपूरणकै निम्ति सत्य निरुपण तथा मेलमिलाप आयोग र बेपत्ता पारिएका व्यक्तिको छानबिन आयोग गठन गरिएको बताउँदै उनले भने, ‘यस्ता खालका द्धन्द्ध भविष्यमा नदोहोरियोस् भनेर पनि हामीले सत्यतथ्य छानबिन गर्नैपर्छ ।’
अध्यक्ष प्रचण्डले दुई आयोग सम्बन्धी ऐन संशोधनको तयारीमा रहेको र पदाधिकारी छिट्टै पठाउने तयारी भएको जानकारी दिँदै उनले सबै घटनामा आममाफी होस् भन्ने सोच नभएको दोहोर्याएका छन् ।
पूर्व प्रधानमन्त्री समेत रहेका प्रचण्डले द्धन्द्धका घटनालाई आममाफी दिने प्रस्ताव आउँदा आफूले अन्तरिम संविधान निर्माणका क्रममा हुन्न भनेर सत्य निरुपण तथा मेलमिलाप र बेपत्ता छानबिन आयोग बनाउने प्रस्ताव गरेको बताएका थिए ।
