काठमाण्डौ: नेपाली काँग्रेसका सभापति शेरबहादुर देउवाले कालीपूर्वको भूभाग नेपाली भएको बताएका छ्न् ।
शुक्रबार नेपाल प्रेस युनियन नवलपुर शाखाले आयोजना गरेको सूर्यभक्त–पतनादेवी स्मृति राष्ट्रिय पत्रकारिता पुरस्कार वितरण समारोहमा काँग्रेस सभापति देउवाले कालीपूर्वको कालापानीसहितको भूभाग नेपालको भएको दावी गरेका हुन् ।
देउवाले भारतले जारी गरेको नक्साको विषयमा सरकारले भारतीय पक्षसँग कुनै ठोस छलफल गर्न नसकेको बताए । उनले भारतले काली नदी र नेपालले महाकाली भन्ने गरेको नदी नै सीमा नदी भएको हुँदा यस पूर्वको भाग नेपालको भएको बताए ।
जुन अंग्रेजले छापेको नक्सामा काली नदी र तिब्बती नक्सामा कुटियाङ्दी भन्ने गरिएको नदी नै महाकाली नदी भएको प्रष्ट पारे । भारतले नक्सा छापेर कालापानी आफ्नो भनेकामा यसको विरोध सरकारले कडा रुपमा गर्नुपर्नेमा जोड दिदै । यसबारे सरकारले अग्रसरता नदेखाएको आरोप समेत लगाए ।
त्यस्तै उनले प्रेस स्वतन्त्रता नभएसम्म प्रजातन्त्र टिक्न नसक्ने भन्दै प्रेस माथि हुने हमला प्रजातन्त्रमाथिको हमला भएको बताएका थिए ।
