काठमाण्डौ: नेकपा (क्रान्तिकारी माओवादी)ले भारतले जारी गरेको नयाँ नक्साको विरोधमा कालापानी जाऔं अभियान सुरु गर्ने भएको छ ।
क्रान्तिकारी माओवादीको तीन दिनसम्म (मंसिर २६-२९ गतेसम्म) बसेको केन्द्रीय समिति बैठकले भारतले सार्वजनिक गरेको नयाँ नक्सामा लिम्पियाधुरा, कालापानी र लिपुलेक सहितको नेपाली भूमि समेटिएको भन्दै त्यसको विरोधमा चरणवद्ध आन्दोलनको घोषणा गरेको हो ।
पार्टी अध्यक्ष मोहन वैद्य किरणद्वारा जारी बिज्ञप्तिमा आन्दोलनको तेस्रो चरणमा पार्टीको मोर्चा संगठन देशभक्त जनगणतान्त्रिक मोर्चा र अन्य जनवर्गीय मोर्चाको पहलमा कालापानी जाऔं अभियान चलाउने उल्लेख गरिएको छ ।
पुस महिनामा पार्टीका जनवर्गीय मोर्चाको बैठक बस्ने, विभिन्न पक्षसँग कार्यगत एकताका लागि छलफल चलाउने र देशका प्रमुख शहरमा विरोध प्रदर्शन गर्ने (क्रान्तिकारी माओवादी)ले निर्णय गरेको छ, जुन आन्दोलनको पहिलो चरणमा पर्दछ ।
त्यस्तै दोस्रो चरणमा भने माघदेखि देशब्यापी रुपमा पार्टी, संयुक्त मोर्चा, जनवर्गीय मोर्चाको संयुक्त अभियान सञ्चालन गर्ने निर्णय गरेको छ ।
सोही बैठकले विकसित देश संयुक्त राज्य अमेरिकाबाट हुने अनियन्त्रित हरित ग्याँस उत्सर्जनका कारण विश्वभर पैदा भएको वातावरणीय असन्तुलन र त्यसले निम्त्याउने खतराबारे जनतालाई सचेत गराउने र त्यसका विरुद्ध आवाज उठाउने निर्णय गरेको विज्ञप्तीमा उल्लेख गरिएको छ ।
