काठमाण्डौः नेपालको गीत-संगीत क्षेत्रका लोकप्रिय संगीतकर्मी राजनराज शिवाकोटीको रचना तथा संगीतका साथै नेपाल भाषा संगीत क्षेत्रकी लोकप्रिय गायिका रत्नशोभा महर्जनसंग उनको युगल गायन रहेको ‘यःमरि च्वामु’ बोलको गीतको म्युजिक भिडियो सार्वजानिक भएको छ ।
नेपाली भाषा तथा नेपाल भाषा मिश्रण गरेर फ्युजनको रुपमा तयार गरिएको यस गीतका रचनाकार राजन राज शिवाकोटी हुन् भने साहित्यकार रजनीमिलाले यसको नेपाल भाषा अनुवाद गरेका हुन् ।
काठमाडौंको टेकु दोभानस्थित राणाकालिन तीन देवल परिसरमा भएको सार्वजनिकिकरण समारोहमा प्रसिद्ध कलाकार मदनकृष्ण श्रेष्ठ मूख्य अतिथीका रुपमा रहेका थिए । उक्त समारोहमा प्रमूख अतिथी श्रेष्ठले गायिका रत्नशोभा महर्जनको प्रतिभा प्रशंसा गर्दै विख्यात संगीतकर्मि सिवाकोटीसंगको युगल गायनले नयाँ आयाम थप्ने विश्वास व्यक्त गरे ।
अशोक कुमार मालि र मनिराज लवटको प्रस्तुति र ए एन एन प्रोडक्शन को निर्माण रहेको उक्त म्युजिक भिडियोमा अशोक कुमार मालि र तिमिला गोपाली लगायत धेरै कलाकारहरुको सहभागीता रहेको थियो ।
यो भिडियोको कोरियोग्राफी राजन शाही, छायांकन,सम्पादन र कलर ग्रेडिंग सोहन मानन्धर, सृंगार सनमकुमार श्रेष्ठ र मिरा डंगोलले गरेका हुन् ।
भिडियो सार्वजनिक समारोहमा आयोजकका तर्फबाट अभिनेत्री हिसिला महर्जनले स्वागत मन्तव्य राखिन् भने प्रस्तोता अशोक कुमार मालि, संगीतकर्मी राजनराज सिवाकोटी,भिडियो निर्देेशक देवकुमार श्रेष्ठ लगायतले उक्त गीत र भिडियो बारे आफ्नो धारणा राखेका थिए ।
शुक्रवार सार्वजनिक गरिएको यो भिडियोको समीक्षा गर्ने क्रममा वरिष्ठ सिने पत्रकार तथा समीक्षक विजयरत्न तुलाधर असंबरेले नेपाल भाषाको म्युजिक भिडियो क्षेत्र दिनानुदिन फराकिलो हुँदै गएको र यस भिडियोमा नेवाः संस्कृतिमा महत्वपुर्ण स्थान रहेको मिठाइ यःमरिलाई भिडियो मा सुन्दर र सटिक ढंगबाट प्रस्तुत गरिएको ले सुनमा सुगन्ध थपिए जस्तो भएको छ भन्ने उदगार व्यक्त गरे ।
