सदाबहार खबरको रफ्तार ....
मंग्सिर ४, २०८३ शुक्रबार
November 20, 2026
होमपेज
राजनीति बिचार अन्तरबार्ता स्वास्थ्य शिक्षा अर्थ/बजार खेलकुद अन्तराष्ट्रिय ☰

विश्रान्ति वृद्धाश्रममा देउसीभैलोको रौनकः ज्येष्ठ नागरिकको मुहारमा खुसी

२०८३ कार्तिक २४, मंगलबार
शेयर गर्नुहोस:
फन्ट परिवर्तन गर्नुहोस: अ अ अ

धनकुटा, २४ कात्तिकः छेउमै निरन्तर सुसाइरहने तमोर नदी । नजिकै छ विश्रान्ति वृद्धाश्रम । जीवनको उत्तराद्र्धमा परिवार र आफन्तबाट टाढिएर बस्न बाध्य ज्येष्ठ नागरिकका लागि चाडपर्वका खुसीहरु प्रायः सम्झनामै सीमित हुने गर्छन् ।

यद्यपि यस वर्षको तिहारमा भने धनकुटाको मुलघाटस्थित विश्रान्ति वृद्धाश्रममा फरक रौनक छायो । धनकुटा नगरपालिका वडा नं ९ मुलघाटस्थित वृद्धाश्रममा बाजागाजासहित पुगेको कलाकार टोलीले देउसीभैलो, गीत तथा नृत्य प्रस्तुत गर्दै त्यहाँ आश्रित ३६ जना ज्येष्ठ नागरिकलाई खुसी बाँडेका छन् ।

कलाकारहरूको गीत र सङ्गीतमा वृद्धाश्रमका ज्येष्ठ नागरिक पनि रमाउँदै नाचेका थिए । केहीका आँखा रसाए, केहीका ओठमा मुस्कान छायो । वरिष्ठ लोकगायक तुलसी पराजुलीको नेतृत्वमा २० जना कलाकार वृद्धाश्रम पुगेका थिए ।

टोलीमा ७६ वर्षीया गायिका टीकादेवी पराजुलीसहित मेघराज घिमिरे, दुर्गा पराजुली, नगेन्द्र कटुवाल, मेखराज कार्की, रमेश अधिकारी र तारा ढकाललगायत कलाकार सहभागी हुनुहुन्थयो ।

गायक पराजुलीले देउसीभैलोसँगै आफ्ना चर्चित गीत ‘खोटाङ जिल्ला दिक्तेल बजार’, ‘कान्छीको छाता ढल्काइदेऊ यता’ र ‘सालैज्यू सालैज्यू’लगायत करिब एक दर्जन गीत प्रस्तुत गर्नुभएको थियो ।

कलाकारहरूको प्रस्तुतिले वृद्धाश्रमको वातावरण निकै उल्लासमय बनेको स्थानीय संयोजक रमेशचन्द्र अधिकारीले जानकारी दिनुभयो । ‘परदेशबाट फर्की आयौँ, आफ्नै देशको माटो सम्झेर…’ भन्ने गीत गुञ्जिरहँदा विश्रान्ति आमा समूहकी सक्रिय सदस्य उर्मिला श्रेष्ठ भावुक बन्नुभयो ।

उहाँले आँसु रोक्न सक्नुभएन । गायक पराजुलीको प्रस्तुतिमा वृद्धाश्रमका ज्येष्ठ नागरिक तथा सहभागीहरू नाच्दै र गाउँदै रमाएका थिए । गायिका टीकादेवी पराजुलीले ७६ वर्षको उमेरमा हालै रेकर्ड गराएको गीत प्रस्तुत गर्दा सबैले उत्साहपूर्वक साथ दिएका थिए ।

मेघराज घिमिरेले हुर्रा भाकाका गीतमार्फत सहभागीलाई नचाउनुभयो भने गायक दुर्गा पराजुलीले पनि आफ्ना चर्चित गीत सुनाएर मनोरञ्जन प्रदान गर्नुभएको थियो ।

वृद्धाश्रममा डेढ दशकदेखि बस्दै आएकी चितवनकी सुशीला वैद्यका लागि यो कार्यक्रम अविस्मरणीय बन्यो । आफन्तजन हुँदाहुँदै पनि भेटघाट गर्न नआउने गरेको पीडा सुनाउँदै उहाँले लामो समयपछि मनैदेखि खुसी हुने अवसर पाएको बताउनुभयो ।

“म यहाँ आएको यत्तिका वर्षपछि आज मनदेखि नै खुसी भएर रमाइलो गर्न पाएँ”, उहाँले भन्नुभयो, “चाडपर्वमा नदी किनारमा बसेर आफन्त सम्झँदै आँसु खसाल्दा मन हलुका बनाएकी छु ।”

वाकरको सहायताले हिँडडुल गर्ने वैद्य पनि गीतको तालमा हात हल्लाउँदै कलाकारलाई साथ दिइरहनुभएको थियो । भोजपुर घर भएकी ७५ वर्षीया सीता तामाङले भने प्रायः सबै गीतमा नाचेर आफ्नो उत्साह देखाउनुभयो ।

उहाँ पनि केही वर्षदेखि वृद्धाश्रममै बस्दै आउनुभएको छ । विगतका तिहारमा अन्यत्र देउसीभैलो खेल्दै आएका कलाकार यस वर्ष वृद्धाश्रमका आमाबुबासँगै रमाउन पाउँदा आफूहरूलाई विशेष आत्मसन्तुष्टि मिलेको बताउनुहुन्छ ।

“परिवारबाट टाढिएका व्यक्तिको अनुहारमा खुसी ल्याउन पाएको महसुस भएको छ”, गायक तुलसी पराजुलीले भन्नुभयो, “उहाँसँगै देउसी खेल्न पाउँदा मनैदेखि खुसी लागेको छ । आत्मसन्तुष्टि मिलेको छ ।”

मनोरञ्जनसँगै कलाकार टोलीले वृद्धाश्रमलाई आर्थिक तथा खाद्य सामग्री सहयोगसमेत गरेको छ । टोलीले रु २२ हजार नगदसहित खाद्यान्न र फलफूल वितरण गरेको हो । गायक पराजुलीको परिवारका तर्फबाट रु ११ हजार १०० सहयोग प्रदान गरिएको थियो ।

समाजसेवी प्रताप थापा, सुमन तामाङलगायतले वृद्धाश्रमका लागि आर्थिक सहयोग गर्नुभएको थियो । सहयोगी दातालाई विश्रान्तिका सल्लाहकार स्वामी विजयानन्द सरस्वती, व्यवस्थापक पद्मप्रसाद काफ्ले, कार्यवाहक महासचिव पुष्करप्रसाद जोशी र क्रियाशील सदस्य दिनेश श्रेष्ठले सम्मानपत्र प्रदान गर्नुभएको थियो । वृद्धाश्रमका तर्फबाट कलाकार टोलीलाई समेत सम्मान गरिएको थियो ।

यो खबर पढेर तपाईलाई कस्तो महसुस भयो ?

तपाइको प्रतिक्रिया राख्नुहोस्

सम्बन्धित समाचार

प्रहरी कर्मचारीका गुनासा सुन्न केन्द्रीय डेस्क स्थापना

नेपाली सेनाले जनताको सूचनाको हकको सम्मान गर्छः प्रवक्ता श्रेष्ठ

सहायक रथी राजेन्द्र श्रेष्ठले सम्हाले नेपाली सेनाको प्रवक्ताको जिम्मेवारी

दूरसञ्चार सेवा प्रदायकलाई जरिवाना र ब्याज मिनाहाको सुविधा

सहकारी ठगी मुद्दामा नेपाली सहित सात जनालाई कैद र जरिवाना

जब्दीघाटमा नयाँ पुल निर्माणका लागि ठेक्का सम्झौता

कानुनी व्यवस्था मिलाएर पीडितलाई राहत दिन्छौँ: सभामुख अर्याल

दक्षिण सुडानमा नेपाली शान्ति सैनिकको अन्तर्राष्ट्रिय सम्मान, १२६ जनाले पाए यूएन पदक

नेपालको ऋण मुक्तिको सङ्कल्पले महालक्ष्मी विशेष साधना

‘विपदमा संगठनको नेतृत्वदायी भूमिका राज्यको विपद् प्रतिकार्य क्षमताको महत्त्वपूर्ण आधार बनेको छ’ : नेपाली सेना

काठमाडौँ महानगरद्वारा ‘जलवायुका लागि बालबालिका’ शीर्षकमा भिडियो प्रतियोगिता

‘नमस्कार, मेरा चिनियाँ डाक्टर’ वृत्तचित्र प्रदर्शनी