काठमाडौंः राष्ट्रिय पुरुष फुटबल टोलीले अर्को महिना इराकसँग मैत्रीपूर्ण खेल खेल्ने पक्का भएको छ । अखिल नेपाल फुटबल संघ (एन्फा) ले इराकसँग मैत्रीपूर्ण खेल खेल्ने पक्का भएको जनाएको छ । एन्फाका अनुसार नेपाल र इराकबीचको खेल बसराह रंगशालामा जेठ १५ गते (२९ मे मा) हुनेछ ।
यसअघि एन्फाले इराक फुटबल संघसँग मौखिक चर्चा भएपनि लिखित रुपमा प्रस्ताव आइनसकेको बताएको थियो । कतार विश्वकप २०२२ छनोटका बाँकी खेलको तयारीका क्रममा इराकले नेपालसँग मैत्रीपूर्ण खेल खेल्न लागेको हो । नेपालले पनि विश्वकप छनोटमा तीन खेल खेल्न बाँकी छ । विश्वकप छनोटमा बहराइनसँग खेल्नुअघि इराकले ताजिकिस्तान र नेपालसँग मैत्रीपूर्ण खेल खेल्ने उल्लेख गरेको छ ।
नेपालसँगको मैत्रीपूर्ण खेलपछि इराकी टोली विश्वकप छनोटको खेलका लागि बहराइन भ्रमणमा निस्कने छ । विश्वकप छनोटको समुह ‘सी’ मा रहेको इराक फिफा बरियतामा ६८औँ स्थानमा रहेको छ । समुह ‘बी’ मा रहेको नेपाल फिफाको वरियतामा १७१औँ स्थानमा छ । नेपालले आफ्नो विश्वकप छनो्टका खेल अन्तर्गत अष्ट्रेलिया,जोर्डन र चाइनिज ताइपेईविरुद्ध खेल्न बाँकी छ ।
गत चैतमा दशरथ रंगशालामा हुने भनिएपनि पछि कोरोनाको कारण देखाउँदै एएफसीले विश्व कप छनोटको नेपाल रहेको समूहको खेल कुवेतमा गर्ने तय गरेको थियो । नेपाल र इराकले हालसम्म तीनपटक खेलेका छन् । पछिल्लोपटक नेपालले २००१ अप्रिलमा विश्वकप छनोटमा खेल्दा नेपाल ४–२ ले पराजित भएको थियो ।
