काठमाण्डौः रुसबाट अत्याधुनिक क्षेप्यास्त्र प्रणाली एस–४०० खरिद गर्ने भारतको तयारीसँगै अमेरिकाले नयाँदिल्लीलाई चेतावनी दिएको छ ।
यदि भारतले उक्त क्षेप्यास्त्र प्रणाली खरिद गरेमा उमाथि अमेरिकी प्रतिबन्ध लाग्न सक्ने खतरा रहेको अमेरिकी अधिकारीहरूले बताएका छन् । यद्यपि अमेरिकी भ्रमणमा रहेका भारतीय विदेशमन्त्री एस जयशंकरले खरिदलाई लिएर अमेरिकालाई मनाउने सकिने बताएका छन् ।
तर अमेरिकी विदेश मन्त्रालयले भने भारतको एक अखबारलाई इमेल मार्फत यस प्रकारको कुनै पनि कारोबार भारतका लागि कठिनाइ बन्न सक्ने र अमेरिकाले उमाथि प्रतिबन्ध लगाउन सक्ने उल्लेख गरेको सञ्चारमाध्यामहरूले जनाएका छन् ।
अमेरिका भन्छ, त्यस्ता किसिमका नियम कानुनको उल्लंघन गर्ने जुनसुकै देश विरुद्ध प्रतिबन्ध लागू हुने ब्यबस्था रहेको छ । रुस, इरान र उत्तर कोरिया अमेरिकाका विराधी देशका रूपमा मानिन्छन् ।
सन् २०१७ अगस्ट २ बाट यो कानुन लागू भएसँगै अमेरिकाले रुसको मामिलामा हतियार खरिद–बिक्री गर्न अन्य देशलाई समेत रोक लगाउँदै आएको छ ।
भारतले भने सन् २०१७ को कानुनसँगै रुससँग रक्षा सम्बन्ध, विशेष गरि एस–४०० क्षेप्यास्त्र प्रणालीको सम्भावित खरिदमा असर पर्ने यसअघि नै अनुमान गरेको थियो।
