काठमाण्डौ : सरकारले आगामी जेठबाट बालबालिकाहरुलाई रोटा भाइरस विरुद्धको खोप दिने भएको छ ।
देशैभर झाडापखलाको समस्या निराकरण गर्न यस्तो रोटाभाईरसको खोप दिने कार्य सुरु गर्न लागिएको हो ।
आगामी जेठबाट स्वास्थ्य सेवा विभाग परिवार कल्याण महाशाखा अन्तर्गतले सो कार्य शुरु गर्ने तयारी गरेको छ ।
दादुरा र रुवेला विरुद्धको खोप फाल्गुन र चैत महिनामा सञ्चालन भएपछि रोटाभाइरसको खोप जेठबाट सञ्चालन गर्ने तयारी भएको परिवार कल्याण महाशाखाले जनाएको छ ।
१५ महिना भित्रका बालबालिकालाई ६ हप्ता र १० हप्तामा गरी दुईपटक दिइने गरिन्छ रोटारिक्स नामक खोप दिइने महाशाखा प्रमुख डा. झलक शर्मा गौतमले बताएका छन् ।
उनका अनुसार झाडा पखलाको मुख्य कारण रोटाभाइरस भएकोले अब १५ महिना मुनिका ६ लाख ३० हजार बढी बालबालिकालाई यो खोप दिने योजना रहेको बताए ।
नियमित खोप कार्यक्रममा अब रोटाभाइरस विरुद्धको खोप थपिएसंगै खोपको संख्या १२ पुग्ने डा. गौतमले जानकारी दिए ।
