काठमाण्डौ: चिकित्सा क्षेत्रमा सुधार सम्बन्धी विभिन्न सात सुत्रिय माग राखी डडेल्धुरामा अनशनरत प्रा.डा. गोविन्द केसीको स्वास्थ्यमा समस्या बढेपछी उनलाई डडेलधुरा अस्पतालमा सारिएको छ ।
सदरमुकाम स्थित डडेल्धुरा अस्पताल परिसर नजिकै रहेको स्थानीय नीलकण्ठ भट्टको निजी घरबाट १७ औं अनशन (सत्याग्रह) शुरू गरेका डा. केसीलाई पाचौं दिन अचानक स्वास्थ्य अवस्था बिग्रँदै गएपछि शुक्रबार साँझ अस्पताल सारिएको हो ।
डडेल्धुराका स्थानिय अगुवाको पहलमा उनलाई स्वास्थ्यमा समस्या देखिएपछि डडेल्धुरा अस्पताल सारिएको छ ।
केसीको हाल अस्पतालको आकस्मिक कक्षको १६ नम्बर बेडमा उपचार भइरहेको अस्पतालका निमित्त मेसु डा.जितेद्र कँडेलले बताए ।
डा. केसीको शरीरमा सुगरको मात्र घटेको अस्पतालका डा. जितेन्द्र कँडेलले जनाएका छ्न् । केसीको शरीरमा सुगरको मात्रा ४३ मा झरेको बताइएको छ । सामान्यतया सुगरको मात्रा ९० देखि १ सय ४० सम्म हुने गर्दछ ।
अहिले केसीलाई स्लाइन दिएर अस्पतालमा राखिएको र उनलाई अहिले बोल्न समेत समस्या भइरहेको डा. कँडेलले बताए ।
