काठमाडौः नेपाल चिकित्सक संघको आगामी तीन बर्षे कार्यकालको लागी मंसिरमा हुने महाधिवेशनमा प्रजातान्त्रिक समूहले महासचिव सहित सबै पदाधिकारीको टुंगो लगाएको छ ।
संघका पूर्वअध्यक्ष एवं प्रजातान्त्रिक समूह निकटका चिकित्सकहरूको लामो बहस र छलफलपछि उम्मेदवार चयनमा सैद्धान्तिक सहमति जुटेको हो । संघका पूर्वअध्यक्ष एवं पदाधिकारीहरूको सैद्धान्तिक सहमतिअनुसार आगामी महाधिवेशनमा महासचिवमा डा. बद्री रिजाललाई उठाउने लगभग पक्का भएको छ ।
त्यसैगरी अन्य पदाधिकारीहरू मध्ये बरिष्ठ उपाध्यक्षमा डा. शिबकुमार श्रेष्ठ, उपाध्यक्षमा डा. अनिलविक्रम कार्की, महासचिवमा डा. बद्री रिजाल, सहसचिवमा डा. प्रकाश बुढाथोकी, कोषाध्यक्षमा डा. शिवजी पौडेल र सहकोषाध्यक्षमा विश्वराज दवाडीको नाममा सैद्धान्तिक सहमति जुटेको छ ।
प्रजातान्त्रिक समूहबाट अध्यक्षका लागि डा. लोचन कार्कीलाई उठाउने यसअघि नै सहमति भएको थियो ।
प्रजातान्त्रिक समूहबाट नेपाल चिकित्सक संघ (एनएमए)को आगामी महाधिवेशनका लागि डा. रिजाल सहित डा. विश्वराज दवाडी, डा. अनिल कार्की, डा. प्रकाश बुढाथोकी, डा. शिवजी पौडेलले इच्छा देखाएका थिए ।
चिकित्साशास्त्र अध्ययन संस्थान (आइओएम)बाट एमबिबिएस गरेका रिजाल सरकारी चिकित्सक संघका पूर्व अध्यक्ष समेत रहिसकेका ब्यक्ति हुन् ।
